Mandala.Sukta 7.56

मैत्रावरुणिर्वसिष्ठ:। मरुत: । त्रिष्टुप् , १-११ द्विपदा विराट् । · maitrāvaruṇirvasiṣṭha: | maruta: | triṣṭup , 1-11 dvipadā virāṭ |

क ईं॒ व्य॑क्ता॒ नर॒: सनी॑ळा रु॒द्रस्य॒ मर्या॒ अध॒ स्वश्वा॑: १नकि॒र्ह्ये॑षां ज॒नूंषि॒ वेद॒ ते अ॒ङ्ग वि॑द्रे मि॒थो ज॒नित्र॑म्॥

ka īṃ vyaktā nara: sanīḷā rudrasya maryā adha svaśvā: 1nakirhyeṣāṃ janūṃṣi veda te aṅga vidre mitho janitram ||

२अ॒भि स्व॒पूभि॑र्मि॒थो व॑पन्त॒ वात॑स्वनसः श्ये॒ना अ॑स्पृध्रन् ३ए॒तानि॒ धीरो॑ नि॒ण्या चि॑केत॒ पृश्नि॒र्यदूधो॑ म॒ही ज॒भार॑॥

2abhi svapūbhirmitho vapanta vātasvanasaḥ śyenā aspṛdhran 3etāni dhīro niṇyā ciketa pṛśniryadūdho mahī jabhāra ||

४सा विट् सु॒वीरा॑ म॒रुद्भि॑रस्तु स॒नात्सह॑न्ती॒ पुष्य॑न्ती नृ॒म्णम् ५यामं॒ येष्ठा॑: शु॒भा शोभि॑ष्ठाः श्रि॒या सम्मि॑श्ला॒ ओजो॑भिरु॒ग्राः॥

4sā viṭ suvīrā marudbhirastu sanātsahantī puṣyantī nṛmṇam 5yāmaṃ yeṣṭhā: śubhā śobhiṣṭhāḥ śriyā sammiślā ojobhirugrāḥ ||

६उ॒ग्रं व॒ ओज॑: स्थि॒रा शवां॒स्यधा॑ म॒रुद्भि॑र्ग॒णस्तुवि॑ष्मान् ७शु॒भ्रो व॒: शुष्म॒: क्रुध्मी॒ मनां॑सि॒ धुनि॒र्मुनि॑रिव॒ शर्ध॑स्य धृ॒ष्णोः॥

6ugraṃ va oja: sthirā śavāṃsyadhā marudbhirgaṇastuviṣmān 7śubhro va: śuṣma: krudhmī manāṃsi dhunirmuniriva śardhasya dhṛṣṇoḥ ||

८सने॑म्य॒स्मद्यु॒योत॑ दि॒द्युं मा वो॑ दुर्म॒तिरि॒ह प्रण॑ङ्नः ९प्रि॒या वो॒ नाम॑ हुवे तु॒राणा॒मा यत्तृ॒पन्म॑रुतो वावशा॒नाः॥

8sanemyasmadyuyota didyuṃ mā vo durmatiriha praṇaṅnaḥ 9priyā vo nāma huve turāṇāmā yattṛpanmaruto vāvaśānāḥ ||

१०स्वा॒यु॒धास॑ इ॒ष्मिण॑: सुनि॒ष्का उ॒त स्व॒यं त॒न्व१: शुम्भ॑मानाः॥

10svāyudhāsa iṣmiṇa: suniṣkā uta svayaṃ tanva1: śumbhamānāḥ ||

११शुची॑ वो ह॒व्या म॑रुत॒: शुची॑नां॒ शुचिं॑ हिनोम्यध्व॒रं शुचि॑भ्यः ।ऋ॒तेन॑ स॒त्यमृ॑त॒साप॑ आय॒ञ्छुचि॑जन्मान॒: शुच॑यः पाव॒काः॥

11śucī vo havyā maruta: śucīnāṃ śuciṃ hinomyadhvaraṃ śucibhyaḥ |ṛtena satyamṛtasāpa āyañchucijanmāna: śucayaḥ pāvakāḥ ||

अंसे॒ष्वा म॑रुतः खा॒दयो॑ वो॒ वक्ष॑:सु रु॒क्मा उ॑पशिश्रिया॒णाः ।वि वि॒द्युतो॒ न वृ॒ष्टिभी॑ रुचा॒ना अनु॑ स्व॒धामायु॑धै॒र्यच्छ॑मानाः॥

aṃseṣvā marutaḥ khādayo vo vakṣa:su rukmā upaśiśriyāṇāḥ |vi vidyuto na vṛṣṭibhī rucānā anu svadhāmāyudhairyacchamānāḥ ||

प्र बु॒ध्न्या॑ व ईरते॒ महां॑सि॒ प्र नामा॑नि प्रयज्यवस्तिरध्वम् ।स॒ह॒स्रियं॒ दम्यं॑ भा॒गमे॒तं गृ॑हमे॒धीयं॑ मरुतो जुषध्वम्॥

pra budhnyā va īrate mahāṃsi pra nāmāni prayajyavastiradhvam |sahasriyaṃ damyaṃ bhāgametaṃ gṛhamedhīyaṃ maruto juṣadhvam ||

यदि॑ स्तु॒तस्य॑ मरुतो अधी॒थेत्था विप्र॑स्य वा॒जिनो॒ हवी॑मन् ।म॒क्षू रा॒यः सु॒वीर्य॑स्य दात॒ नू चि॒द्यम॒न्य आ॒दभ॒दरा॑वा॥

yadi stutasya maruto adhīthetthā viprasya vājino havīman |makṣū rāyaḥ suvīryasya dāta nū cidyamanya ādabhadarāvā ||

अत्या॑सो॒ न ये म॒रुत॒: स्वञ्चो॑ यक्ष॒दृशो॒ न शु॒भय॑न्त॒ मर्या॑: ।ते ह॑र्म्ये॒ष्ठाः शिश॑वो॒ न शु॒भ्रा व॒त्सासो॒ न प्र॑क्री॒ळिन॑: पयो॒धाः॥

atyāso na ye maruta: svañco yakṣadṛśo na śubhayanta maryā: |te harmyeṣṭhāḥ śiśavo na śubhrā vatsāso na prakrīḷina: payodhāḥ ||

द॒श॒स्यन्तो॑ नो म॒रुतो॑ मृळन्तु वरिव॒स्यन्तो॒ रोद॑सी सु॒मेके॑ ।आ॒रे गो॒हा नृ॒हा व॒धो वो॑ अस्तु सु॒म्नेभि॑र॒स्मे व॑सवो नमध्वम्॥

daśasyanto no maruto mṛḷantu varivasyanto rodasī sumeke |āre gohā nṛhā vadho vo astu sumnebhirasme vasavo namadhvam ||

आ वो॒ होता॑ जोहवीति स॒त्तः स॒त्राचीं॑ रा॒तिं म॑रुतो गृणा॒नः ।य ईव॑तो वृषणो॒ अस्ति॑ गो॒पाः सो अद्व॑यावी हवते व उ॒क्थैः॥

ā vo hotā johavīti sattaḥ satrācīṃ rātiṃ maruto gṛṇānaḥ |ya īvato vṛṣaṇo asti gopāḥ so advayāvī havate va ukthaiḥ ||

इ॒मे तु॒रं म॒रुतो॑ रामयन्ती॒मे सह॒: सह॑स॒ आ न॑मन्ति ।इ॒मे शंसं॑ वनुष्य॒तो नि पा॑न्ति गु॒रु द्वेषो॒ अर॑रुषे दधन्ति॥

ime turaṃ maruto rāmayantīme saha: sahasa ā namanti |ime śaṃsaṃ vanuṣyato ni pānti guru dveṣo araruṣe dadhanti ||

इ॒मे र॒ध्रं चि॑न्म॒रुतो॑ जुनन्ति॒ भृमिं॑ चि॒द्यथा॒ वस॑वो जु॒षन्त॑ ।अप॑ बाधध्वं वृषण॒स्तमां॑सि ध॒त्त विश्वं॒ तन॑यं तो॒कम॒स्मे॥

ime radhraṃ cinmaruto junanti bhṛmiṃ cidyathā vasavo juṣanta |apa bādhadhvaṃ vṛṣaṇastamāṃsi dhatta viśvaṃ tanayaṃ tokamasme ||

मा वो॑ दा॒त्रान्म॑रुतो॒ निर॑राम॒ मा प॒श्चाद्द॑घ्म रथ्यो विभा॒गे ।आ न॑: स्पा॒र्हे भ॑जतना वस॒व्ये॒३ यदीं॑ सुजा॒तं वृ॑षणो वो॒ अस्ति॑॥

mā vo dātrānmaruto nirarāma mā paścāddaghma rathyo vibhāge |ā na: spārhe bhajatanā vasavye3 yadīṃ sujātaṃ vṛṣaṇo vo asti ||

सं यद्धन॑न्त म॒न्युभि॒र्जना॑स॒: शूरा॑ य॒ह्वीष्वोष॑धीषु वि॒क्षु ।अध॑ स्मा नो मरुतो रुद्रियासस्त्रा॒तारो॑ भूत॒ पृत॑नास्व॒र्यः॥

saṃ yaddhananta manyubhirjanāsa: śūrā yahvīṣvoṣadhīṣu vikṣu |adha smā no maruto rudriyāsastrātāro bhūta pṛtanāsvaryaḥ ||

भूरि॑ चक्र मरुत॒: पित्र्या॑ण्यु॒क्थानि॒ या व॑: श॒स्यन्ते॑ पु॒रा चि॑त् ।म॒रुद्भि॑रु॒ग्रः पृत॑नासु॒ साळ्हा॑ म॒रुद्भि॒रित्सनि॑ता॒ वाज॒मर्वा॑॥

bhūri cakra maruta: pitryāṇyukthāni yā va: śasyante purā cit |marudbhirugraḥ pṛtanāsu sāḷhā marudbhiritsanitā vājamarvā ||

अ॒स्मे वी॒रो म॑रुतः शु॒ष्म्य॑स्तु॒ जना॑नां॒ यो असु॑रो विध॒र्ता ।अ॒पो येन॑ सुक्षि॒तये॒ तरे॒माऽध॒ स्वमोको॑ अ॒भि व॑: स्याम॥

asme vīro marutaḥ śuṣmyastu janānāṃ yo asuro vidhartā |apo yena sukṣitaye taremā'dha svamoko abhi va: syāma ||

तन्न॒ इन्द्रो॒ वरु॑णो मि॒त्रो अ॒ग्निराप॒ ओष॑धीर्व॒निनो॑ जुषन्त ।शर्म॑न्त्स्याम म॒रुता॑मु॒पस्थे॑ यू॒यं पा॑त स्व॒स्तिभि॒: सदा॑ नः॥

tanna indro varuṇo mitro agnirāpa oṣadhīrvanino juṣanta |śarmantsyāma marutāmupasthe yūyaṃ pāta svastibhi: sadā naḥ ||