Mandala.Sukta 8.22

सोभरि : काण्व:।अश्विनौ ।१-६ प्रगाथ: = ( विषमा बृहती , समा सतोबृहती ), ७ बृहती , ८ अनुष्टुप् , ११ ककुप् , १२ मध्येज्योति:, प्रगाथ:=(९ ,१३,१५,१७ ककुप् ; १०, १४ ,१६ ,१८ सतोबृहती ) । · sobhari : kāṇva: |aśvinau |1-6 pragātha: = ( viṣamā bṛhatī , samā satobṛhatī ), 7 bṛhatī , 8 anuṣṭup , 11 kakup , 12 madhyejyoti:, pragātha:=(9 ,13,15,17 kakup ; 10, 14 ,16 ,18 satobṛhatī ) |

ओ त्यम॑ह्व॒ आ रथ॑म॒द्या दंसि॑ष्ठमू॒तये॑ ।यम॑श्विना सुहवा रुद्रवर्तनी॒ आ सू॒र्यायै॑ त॒स्थथु॑:॥

o tyamahva ā rathamadyā daṃsiṣṭhamūtaye |yamaśvinā suhavā rudravartanī ā sūryāyai tasthathu: ||

पू॒र्वा॒पुषं॑ सु॒हवं॑ पुरु॒स्पृहं॑ भु॒ज्युं वाजे॑षु॒ पूर्व्य॑म् ।स॒च॒नाव॑न्तं सुम॒तिभि॑: सोभरे॒ विद्वे॑षसमने॒हस॑म्॥

pūrvāpuṣaṃ suhavaṃ puruspṛhaṃ bhujyuṃ vājeṣu pūrvyam |sacanāvantaṃ sumatibhi: sobhare vidveṣasamanehasam ||

इ॒ह त्या पु॑रु॒भूत॑मा दे॒वा नमो॑भिर॒श्विना॑ ।अ॒र्वा॒ची॒ना स्वव॑से करामहे॒ गन्ता॑रा दा॒शुषो॑ गृ॒हम्॥

iha tyā purubhūtamā devā namobhiraśvinā |arvācīnā svavase karāmahe gantārā dāśuṣo gṛham ||

यु॒वो रथ॑स्य॒ परि॑ च॒क्रमी॑यत ई॒र्मान्यद्वा॑मिषण्यति ।अ॒स्माँ अच्छा॑ सुम॒तिर्वां॑ शुभस्पती॒ आ धे॒नुरि॑व धावतु॥

yuvo rathasya pari cakramīyata īrmānyadvāmiṣaṇyati |asmām̐ acchā sumatirvāṃ śubhaspatī ā dhenuriva dhāvatu ||

रथो॒ यो वां॑ त्रिवन्धु॒रो हिर॑ण्याभीशुरश्विना ।परि॒ द्यावा॑पृथि॒वी भूष॑ति श्रु॒तस्तेन॑ नास॒त्या ग॑तम्॥

ratho yo vāṃ trivandhuro hiraṇyābhīśuraśvinā |pari dyāvāpṛthivī bhūṣati śrutastena nāsatyā gatam ||

द॒श॒स्यन्ता॒ मन॑वे पू॒र्व्यं दि॒वि यवं॒ वृके॑ण कर्षथः ।ता वा॑म॒द्य सु॑म॒तिभि॑: शुभस्पती॒ अश्वि॑ना॒ प्र स्तु॑वीमहि॥

daśasyantā manave pūrvyaṃ divi yavaṃ vṛkeṇa karṣathaḥ |tā vāmadya sumatibhi: śubhaspatī aśvinā pra stuvīmahi ||

उप॑ नो वाजिनीवसू या॒तमृ॒तस्य॑ प॒थिभि॑: ।येभि॑स्तृ॒क्षिं वृ॑षणा त्रासदस्य॒वं म॒हे क्ष॒त्राय॒ जिन्व॑थः॥

upa no vājinīvasū yātamṛtasya pathibhi: |yebhistṛkṣiṃ vṛṣaṇā trāsadasyavaṃ mahe kṣatrāya jinvathaḥ ||

अ॒यं वा॒मद्रि॑भिः सु॒तः सोमो॑ नरा वृषण्वसू ।आ या॑तं॒ सोम॑पीतये॒ पिब॑तं दा॒शुषो॑ गृ॒हे॥

ayaṃ vāmadribhiḥ sutaḥ somo narā vṛṣaṇvasū |ā yātaṃ somapītaye pibataṃ dāśuṣo gṛhe ||

आ हि रु॒हत॑मश्विना॒ रथे॒ कोशे॑ हिर॒ण्यये॑ वृषण्वसू ।यु॒ञ्जाथां॒ पीव॑री॒रिष॑:॥

ā hi ruhatamaśvinā rathe kośe hiraṇyaye vṛṣaṇvasū |yuñjāthāṃ pīvarīriṣa: ||

याभि॑: प॒क्थमव॑थो॒ याभि॒रध्रि॑गुं॒ याभि॑र्ब॒भ्रुं विजो॑षसम् ।ताभि॑र्नो म॒क्षू तूय॑मश्वि॒ना ग॑तं भिष॒ज्यतं॒ यदातु॑रम्॥

yābhi: pakthamavatho yābhiradhriguṃ yābhirbabhruṃ vijoṣasam |tābhirno makṣū tūyamaśvinā gataṃ bhiṣajyataṃ yadāturam ||

यदध्रि॑गावो॒ अध्रि॑गू इ॒दा चि॒दह्नो॑ अ॒श्विना॒ हवा॑महे ।व॒यं गी॒र्भिर्वि॑प॒न्यव॑:॥

yadadhrigāvo adhrigū idā cidahno aśvinā havāmahe |vayaṃ gīrbhirvipanyava: ||

ताभि॒रा या॑तं वृष॒णोप॑ मे॒ हवं॑ वि॒श्वप्सुं॑ वि॒श्ववा॑र्यम् ।इ॒षा मंहि॑ष्ठा पुरु॒भूत॑मा नरा॒ याभि॒: क्रिविं॑ वावृ॒धुस्ताभि॒रा ग॑तम्॥

tābhirā yātaṃ vṛṣaṇopa me havaṃ viśvapsuṃ viśvavāryam |iṣā maṃhiṣṭhā purubhūtamā narā yābhi: kriviṃ vāvṛdhustābhirā gatam ||

तावि॒दा चि॒दहा॑नां॒ ताव॒श्विना॒ वन्द॑मान॒ उप॑ ब्रुवे ।ता ऊ॒ नमो॑भिरीमहे॥

tāvidā cidahānāṃ tāvaśvinā vandamāna upa bruve |tā ū namobhirīmahe ||

ताविद्दो॒षा ता उ॒षसि॑ शु॒भस्पती॒ ता याम॑न्रु॒द्रव॑र्तनी ।मा नो॒ मर्ता॑य रि॒पवे॑ वाजिनीवसू प॒रो रु॑द्रा॒वति॑ ख्यतम्॥

tāviddoṣā tā uṣasi śubhaspatī tā yāmanrudravartanī |mā no martāya ripave vājinīvasū paro rudrāvati khyatam ||

आ सुग्म्या॑य॒ सुग्म्यं॑ प्रा॒ता रथे॑ना॒श्विना॑ वा स॒क्षणी॑ ।हु॒वे पि॒तेव॒ सोभ॑री॥

ā sugmyāya sugmyaṃ prātā rathenāśvinā vā sakṣaṇī |huve piteva sobharī ||

मनो॑जवसा वृषणा मदच्युता मक्षुंग॒माभि॑रू॒तिभि॑: ।आ॒रात्ता॑च्चिद्भूतम॒स्मे अव॑से पू॒र्वीभि॑: पुरुभोजसा॥

manojavasā vṛṣaṇā madacyutā makṣuṃgamābhirūtibhi: |ārāttāccidbhūtamasme avase pūrvībhi: purubhojasā ||

आ नो॒ अश्वा॑वदश्विना व॒र्तिर्या॑सिष्टं मधुपातमा नरा ।गोम॑द्दस्रा॒ हिर॑ण्यवत्॥

ā no aśvāvadaśvinā vartiryāsiṣṭaṃ madhupātamā narā |gomaddasrā hiraṇyavat ||

सु॒प्रा॒व॒र्गं सु॒वीर्यं॑ सु॒ष्ठु वार्य॒मना॑धृष्टं रक्ष॒स्विना॑ ।अ॒स्मिन्ना वा॑मा॒याने॑ वाजिनीवसू॒ विश्वा॑ वा॒मानि॑ धीमहि॥

suprāvargaṃ suvīryaṃ suṣṭhu vāryamanādhṛṣṭaṃ rakṣasvinā |asminnā vāmāyāne vājinīvasū viśvā vāmāni dhīmahi ||