Mandala.Sukta 8.32

मेधातिथि : काण्व:। इन्द्र: । गायत्री । · medhātithi : kāṇva: | indra: | gāyatrī |

प्र कृ॒तान्यृ॑जी॒षिण॒: कण्वा॒ इन्द्र॑स्य॒ गाथ॑या ।मदे॒ सोम॑स्य वोचत॥

pra kṛtānyṛjīṣiṇa: kaṇvā indrasya gāthayā |made somasya vocata ||

यः सृबि॑न्द॒मन॑र्शनिं॒ पिप्रुं॑ दा॒सम॑ही॒शुव॑म् ।वधी॑दु॒ग्रो रि॒णन्न॒पः॥

yaḥ sṛbindamanarśaniṃ pipruṃ dāsamahīśuvam |vadhīdugro riṇannapaḥ ||

न्यर्बु॑दस्य वि॒ष्टपं॑ व॒र्ष्माणं॑ बृह॒तस्ति॑र ।कृ॒षे तदि॑न्द्र॒ पौंस्य॑म्॥

nyarbudasya viṣṭapaṃ varṣmāṇaṃ bṛhatastira |kṛṣe tadindra pauṃsyam ||

प्रति॑ श्रु॒ताय॑ वो धृ॒षत्तूर्णा॑शं॒ न गि॒रेरधि॑ ।हु॒वे सु॑शि॒प्रमू॒तये॑॥

prati śrutāya vo dhṛṣattūrṇāśaṃ na gireradhi |huve suśipramūtaye ||

स गोरश्व॑स्य॒ वि व्र॒जं म॑न्दा॒नः सो॒म्येभ्य॑: ।पुरं॒ न शू॑र दर्षसि॥

sa goraśvasya vi vrajaṃ mandānaḥ somyebhya: |puraṃ na śūra darṣasi ||

यदि॑ मे रा॒रण॑: सु॒त उ॒क्थे वा॒ दध॑से॒ चन॑: ।आ॒रादुप॑ स्व॒धा ग॑हि॥

yadi me rāraṇa: suta ukthe vā dadhase cana: |ārādupa svadhā gahi ||

व॒यं घा॑ ते॒ अपि॑ ष्मसि स्तो॒तार॑ इन्द्र गिर्वणः ।त्वं नो॑ जिन्व सोमपाः॥

vayaṃ ghā te api ṣmasi stotāra indra girvaṇaḥ |tvaṃ no jinva somapāḥ ||

उ॒त न॑: पि॒तुमा भ॑र संररा॒णो अवि॑क्षितम् ।मघ॑व॒न्भूरि॑ ते॒ वसु॑॥

uta na: pitumā bhara saṃrarāṇo avikṣitam |maghavanbhūri te vasu ||

उ॒त नो॒ गोम॑तस्कृधि॒ हिर॑ण्यवतो अ॒श्विन॑: ।इळा॑भि॒: सं र॑भेमहि॥

uta no gomataskṛdhi hiraṇyavato aśvina: |iḷābhi: saṃ rabhemahi ||

बृ॒बदु॑क्थं हवामहे सृ॒प्रक॑रस्नमू॒तये॑ ।साधु॑ कृ॒ण्वन्त॒मव॑से॥

bṛbadukthaṃ havāmahe sṛprakarasnamūtaye |sādhu kṛṇvantamavase ||

यः सं॒स्थे चि॑च्छ॒तक्र॑तु॒रादीं॑ कृ॒णोति॑ वृत्र॒हा ।ज॒रि॒तृभ्य॑: पुरू॒वसु॑:॥

yaḥ saṃsthe cicchatakraturādīṃ kṛṇoti vṛtrahā |jaritṛbhya: purūvasu: ||

स न॑: श॒क्रश्चि॒दा श॑क॒द्दान॑वाँ अन्तराभ॒रः ।इन्द्रो॒ विश्वा॑भिरू॒तिभि॑:॥

sa na: śakraścidā śakaddānavām̐ antarābharaḥ |indro viśvābhirūtibhi: ||

यो रा॒यो॒३ऽवनि॑र्म॒हान्त्सु॑पा॒रः सु॑न्व॒तः सखा॑ ।तमिन्द्र॑म॒भि गा॑यत॥

yo rāyo3'vanirmahāntsupāraḥ sunvataḥ sakhā |tamindramabhi gāyata ||

आ॒य॒न्तारं॒ महि॑ स्थि॒रं पृत॑नासु श्रवो॒जित॑म् ।भूरे॒रीशा॑न॒मोज॑सा॥

āyantāraṃ mahi sthiraṃ pṛtanāsu śravojitam |bhūrerīśānamojasā ||

नकि॑रस्य॒ शची॑नां निय॒न्ता सू॒नृता॑नाम् ।नकि॑र्व॒क्ता न दा॒दिति॑॥

nakirasya śacīnāṃ niyantā sūnṛtānām |nakirvaktā na dāditi ||

न नू॒नं ब्र॒ह्मणा॑मृ॒णं प्रा॑शू॒नाम॑स्ति सुन्व॒ताम् ।न सोमो॑ अप्र॒ता प॑पे॥

na nūnaṃ brahmaṇāmṛṇaṃ prāśūnāmasti sunvatām |na somo apratā pape ||

पन्य॒ इदुप॑ गायत॒ पन्य॑ उ॒क्थानि॑ शंसत ।ब्रह्मा॑ कृणोत॒ पन्य॒ इत्॥

panya idupa gāyata panya ukthāni śaṃsata |brahmā kṛṇota panya it ||

पन्य॒ आ द॑र्दिरच्छ॒ता स॒हस्रा॑ वा॒ज्यवृ॑तः ।इन्द्रो॒ यो यज्व॑नो वृ॒धः॥

panya ā dardiracchatā sahasrā vājyavṛtaḥ |indro yo yajvano vṛdhaḥ ||

वि षू च॑र स्व॒धा अनु॑ कृष्टी॒नामन्वा॒हुव॑: ।इन्द्र॒ पिब॑ सु॒ताना॑म्॥

vi ṣū cara svadhā anu kṛṣṭīnāmanvāhuva: |indra piba sutānām ||

पिब॒ स्वधै॑नवानामु॒त यस्तुग्र्ये॒ सचा॑ ।उ॒तायमि॑न्द्र॒ यस्तव॑॥

piba svadhainavānāmuta yastugrye sacā |utāyamindra yastava ||

अती॑हि मन्युषा॒विणं॑ सुषु॒वांस॑मु॒पार॑णे ।इ॒मं रा॒तं सु॒तं पि॑ब॥

atīhi manyuṣāviṇaṃ suṣuvāṃsamupāraṇe |imaṃ rātaṃ sutaṃ piba ||

१इ॒हि ति॒स्रः प॑रा॒वत॑ इ॒हि पञ्च॒ जनाँ॒ अति॑ ।धेना॑ इन्द्राव॒चाक॑शत्॥

1ihi tisraḥ parāvata ihi pañca janām̐ ati |dhenā indrāvacākaśat ||

सूर्यो॑ र॒श्मिं यथा॑ सृ॒जा ऽऽत्वा॑ यच्छन्तु मे॒ गिर॑: ।नि॒म्नमापो॒ न स॒ध्र्य॑क्॥

sūryo raśmiṃ yathā sṛjā ''tvā yacchantu me gira: |nimnamāpo na sadhryak ||

अध्व॑र्य॒वा तु हि षि॒ञ्च सोमं॑ वी॒राय॑ शि॒प्रिणे॑ ।भरा॑ सु॒तस्य॑ पी॒तये॑॥

adhvaryavā tu hi ṣiñca somaṃ vīrāya śipriṇe |bharā sutasya pītaye ||

य उ॒द्नः फ॑लि॒गं भि॒नन्न्य१क्सिन्धूँ॑र॒वासृ॑जत् ।यो गोषु॑ प॒क्वं धा॒रय॑त्॥

ya udnaḥ phaligaṃ bhinannya1ksindhūm̐ravāsṛjat |yo goṣu pakvaṃ dhārayat ||

अह॑न्वृ॒त्रमृची॑षम और्णवा॒भम॑ही॒शुव॑म् ।हि॒मेना॑विध्य॒दर्बु॑दम्॥

ahanvṛtramṛcīṣama aurṇavābhamahīśuvam |himenāvidhyadarbudam ||

प्र व॑ उ॒ग्राय॑ नि॒ष्टुरेऽषा॑ळ्हाय प्रस॒क्षिणे॑ ।दे॒वत्तं॒ ब्रह्म॑ गायत॥

pra va ugrāya niṣṭure'ṣāḷhāya prasakṣiṇe |devattaṃ brahma gāyata ||

यो विश्वा॑न्य॒भि व्र॒ता सोम॑स्य॒ मदे॒ अन्ध॑सः ।इन्द्रो॑ दे॒वेषु॒ चेत॑ति॥

yo viśvānyabhi vratā somasya made andhasaḥ |indro deveṣu cetati ||

इ॒ह त्या स॑ध॒माद्या॒ हरी॒ हिर॑ण्यकेश्या ।वो॒ळ्हाम॒भि प्रयो॑ हि॒तम्॥

iha tyā sadhamādyā harī hiraṇyakeśyā |voḷhāmabhi prayo hitam ||

अ॒र्वाञ्चं॑ त्वा पुरुष्टुत प्रि॒यमे॑धस्तुता॒ हरी॑ ।सो॒म॒पेया॑य वक्षतः॥

arvāñcaṃ tvā puruṣṭuta priyamedhastutā harī |somapeyāya vakṣataḥ ||