Mandala.Sukta 8.31

मनुर्वैवस्वत: ।१-४ यज्ञ: यजमानश्च , ५-९ दंपति , १०-१८ दम्पत्याशिष: । गायत्री ; ९,१४ अनुष्टुप् , १० पादनिचृत , १५-१८ पंक्ति: । · manurvaivasvata: |1-4 yajña: yajamānaśca , 5-9 daṃpati , 10-18 dampatyāśiṣa: | gāyatrī ; 9,14 anuṣṭup , 10 pādanicṛta , 15-18 paṃkti: |

यो यजा॑ति॒ यजा॑त॒ इत्सु॒नव॑च्च॒ पचा॑ति च ।ब्र॒ह्मेदिन्द्र॑स्य चाकनत्॥

yo yajāti yajāta itsunavacca pacāti ca |brahmedindrasya cākanat ||

पु॒रो॒ळाशं॒ यो अ॑स्मै॒ सोमं॒ रर॑त आ॒शिर॑म् ।पादित्तं श॒क्रो अंह॑सः॥

puroḷāśaṃ yo asmai somaṃ rarata āśiram |pādittaṃ śakro aṃhasaḥ ||

तस्य॑ द्यु॒माँ अ॑स॒द्रथो॑ दे॒वजू॑त॒: स शू॑शुवत् ।विश्वा॑ व॒न्वन्न॑मि॒त्रिया॑॥

tasya dyumām̐ asadratho devajūta: sa śūśuvat |viśvā vanvannamitriyā ||

अस्य॑ प्र॒जाव॑ती गृ॒हेऽस॑श्चन्ती दि॒वेदि॑वे ।इळा॑ धेनु॒मती॑ दुहे॥

asya prajāvatī gṛhe'saścantī divedive |iḷā dhenumatī duhe ||

या दम्प॑ती॒ सम॑नसा सुनु॒त आ च॒ धाव॑तः ।देवा॑सो॒ नित्य॑या॒शिरा॑॥

yā dampatī samanasā sunuta ā ca dhāvataḥ |devāso nityayāśirā ||

प्रति॑ प्राश॒व्याँ॑ इतः स॒म्यञ्चा॑ ब॒र्हिरा॑शाते ।न ता वाजे॑षु वायतः॥

prati prāśavyām̐ itaḥ samyañcā barhirāśāte |na tā vājeṣu vāyataḥ ||

न दे॒वाना॒मपि॑ ह्नुतः सुम॒तिं न जु॑गुक्षतः ।श्रवो॑ बृ॒हद्वि॑वासतः॥

na devānāmapi hnutaḥ sumatiṃ na jugukṣataḥ |śravo bṛhadvivāsataḥ ||

पु॒त्रिणा॒ ता कु॑मा॒रिणा॒ विश्व॒मायु॒र्व्य॑श्नुतः ।उ॒भा हिर॑ण्यपेशसा॥

putriṇā tā kumāriṇā viśvamāyurvyaśnutaḥ |ubhā hiraṇyapeśasā ||

वी॒तिहो॑त्रा कृ॒तद्व॑सू दश॒स्यन्ता॒मृता॑य॒ कम् ।समूधो॑ रोम॒शं ह॑तो दे॒वेषु॑ कृणुतो॒ दुव॑:॥

vītihotrā kṛtadvasū daśasyantāmṛtāya kam |samūdho romaśaṃ hato deveṣu kṛṇuto duva: ||

आ शर्म॒ पर्व॑तानां वृणी॒महे॑ न॒दीना॑म् ।आ विष्णो॑: सचा॒भुव॑:॥

ā śarma parvatānāṃ vṛṇīmahe nadīnām |ā viṣṇo: sacābhuva: ||

ऐतु॑ पू॒षा र॒यिर्भग॑: स्व॒स्ति स॑र्व॒धात॑मः ।उ॒रुरध्वा॑ स्व॒स्तये॑॥

aitu pūṣā rayirbhaga: svasti sarvadhātamaḥ |ururadhvā svastaye ||

अ॒रम॑तिरन॒र्वणो॒ विश्वो॑ दे॒वस्य॒ मन॑सा ।आ॒दि॒त्याना॑मने॒ह इत्॥

aramatiranarvaṇo viśvo devasya manasā |ādityānāmaneha it ||

यथा॑ नो मि॒त्रो अ॑र्य॒मा वरु॑ण॒: सन्ति॑ गो॒पाः ।सु॒गा ऋ॒तस्य॒ पन्था॑:॥

yathā no mitro aryamā varuṇa: santi gopāḥ |sugā ṛtasya panthā: ||

अ॒ग्निं व॑: पू॒र्व्यं गि॒रा दे॒वमी॑ळे॒ वसू॑नाम् ।स॒प॒र्यन्त॑: पुरुप्रि॒यं मि॒त्रं न क्षे॑त्र॒साध॑सम्॥

agniṃ va: pūrvyaṃ girā devamīḷe vasūnām |saparyanta: purupriyaṃ mitraṃ na kṣetrasādhasam ||

म॒क्षू दे॒वव॑तो॒ रथ॒: शूरो॑ वा पृ॒त्सु कासु॑ चित् ।दे॒वानां॒ य इन्मनो॒ यज॑मान॒ इय॑क्षत्य॒भीदय॑ज्वनो भुवत्॥

makṣū devavato ratha: śūro vā pṛtsu kāsu cit |devānāṃ ya inmano yajamāna iyakṣatyabhīdayajvano bhuvat ||

न य॑जमान रिष्यसि॒ न सु॑न्वान॒ न दे॑वयो ।दे॒वानां॒ य इन्मनो॒ यज॑मान॒ इय॑क्षत्य॒भीदय॑ज्वनो भुवत्॥

na yajamāna riṣyasi na sunvāna na devayo |devānāṃ ya inmano yajamāna iyakṣatyabhīdayajvano bhuvat ||

नकि॒ष्टं कर्म॑णा नश॒न्न प्र यो॑ष॒न्न यो॑षति ।दे॒वानां॒ य इन्मनो॒ यज॑मान॒ इय॑क्षत्य॒भीदय॑ज्वनो भुवत्॥

nakiṣṭaṃ karmaṇā naśanna pra yoṣanna yoṣati |devānāṃ ya inmano yajamāna iyakṣatyabhīdayajvano bhuvat ||

अस॒दत्र॑ सु॒वीर्य॑मु॒त त्यदा॒श्वश्व्य॑म् ।दे॒वानां॒ य इन्मनो॒ यज॑मान॒ इय॑क्षत्य॒भीदय॑ज्वनो भुवत्॥

asadatra suvīryamuta tyadāśvaśvyam |devānāṃ ya inmano yajamāna iyakṣatyabhīdayajvano bhuvat ||