Mandala.Sukta 8.45

त्रिशोक: काण्व:। इन्द्र:; १ अग्नीन्द्रौ ।गायत्री । · triśoka: kāṇva: | indra:; 1 agnīndrau |gāyatrī |

आ घा॒ ये अ॒ग्निमि॑न्ध॒ते स्तृ॒णन्ति॑ ब॒र्हिरा॑नु॒षक् ।येषा॒मिन्द्रो॒ युवा॒ सखा॑॥

ā ghā ye agnimindhate stṛṇanti barhirānuṣak |yeṣāmindro yuvā sakhā ||

बृ॒हन्निदि॒ध्म ए॑षां॒ भूरि॑ श॒स्तं पृ॒थुः स्वरु॑: ।येषा॒मिन्द्रो॒ युवा॒ सखा॑॥

bṛhannididhma eṣāṃ bhūri śastaṃ pṛthuḥ svaru: |yeṣāmindro yuvā sakhā ||

अयु॑द्ध॒ इद्यु॒धा वृतं॒ शूर॒ आज॑ति॒ सत्व॑भिः ।येषा॒मिन्द्रो॒ युवा॒ सखा॑॥

ayuddha idyudhā vṛtaṃ śūra ājati satvabhiḥ |yeṣāmindro yuvā sakhā ||

आ बु॒न्दं वृ॑त्र॒हा द॑दे जा॒तः पृ॑च्छ॒द्वि मा॒तर॑म् ।क उ॒ग्राः के ह॑ शृण्विरे॥

ā bundaṃ vṛtrahā dade jātaḥ pṛcchadvi mātaram |ka ugrāḥ ke ha śṛṇvire ||

प्रति॑ त्वा शव॒सी व॑दद्गि॒रावप्सो॒ न यो॑धिषत् ।यस्ते॑ शत्रु॒त्वमा॑च॒के॥

prati tvā śavasī vadadgirāvapso na yodhiṣat |yaste śatrutvamācake ||

उ॒त त्वं म॑घवञ्छृणु॒ यस्ते॒ वष्टि॑ व॒वक्षि॒ तत् ।यद्वी॒ळया॑सि वी॒ळु तत्॥

uta tvaṃ maghavañchṛṇu yaste vaṣṭi vavakṣi tat |yadvīḷayāsi vīḷu tat ||

यदा॒जिं यात्या॑जि॒कृदिन्द्र॑: स्वश्व॒युरुप॑ ।र॒थीत॑मो र॒थीना॑म्॥

yadājiṃ yātyājikṛdindra: svaśvayurupa |rathītamo rathīnām ||

वि षु विश्वा॑ अभि॒युजो॒ वज्रि॒न्विष्व॒ग्यथा॑ वृह ।भवा॑ नः सु॒श्रव॑स्तमः॥

vi ṣu viśvā abhiyujo vajrinviṣvagyathā vṛha |bhavā naḥ suśravastamaḥ ||

अ॒स्माकं॒ सु रथं॑ पु॒र इन्द्र॑: कृणोतु सा॒तये॑ ।न यं धूर्व॑न्ति धू॒र्तय॑:॥

asmākaṃ su rathaṃ pura indra: kṛṇotu sātaye |na yaṃ dhūrvanti dhūrtaya: ||

वृ॒ज्याम॑ ते॒ परि॒ द्विषोऽरं॑ ते शक्र दा॒वने॑ ।ग॒मेमेदि॑न्द्र॒ गोम॑तः॥

vṛjyāma te pari dviṣo'raṃ te śakra dāvane |gamemedindra gomataḥ ||

शनै॑श्चि॒द्यन्तो॑ अद्रि॒वोऽश्वा॑वन्तः शत॒ग्विन॑: ।वि॒वक्ष॑णा अने॒हस॑:॥

śanaiścidyanto adrivo'śvāvantaḥ śatagvina: |vivakṣaṇā anehasa: ||

ऊ॒र्ध्वा हि ते॑ दि॒वेदि॑वे स॒हस्रा॑ सू॒नृता॑ श॒ता ।ज॒रि॒तृभ्यो॑ वि॒मंह॑ते॥

ūrdhvā hi te divedive sahasrā sūnṛtā śatā |jaritṛbhyo vimaṃhate ||

वि॒द्मा हि त्वा॑ धनंज॒यमिन्द्र॑ दृ॒ळ्हा चि॑दारु॒जम् ।आ॒दा॒रिणं॒ यथा॒ गय॑म्॥

vidmā hi tvā dhanaṃjayamindra dṛḷhā cidārujam |ādāriṇaṃ yathā gayam ||

क॒कु॒हं चि॑त्त्वा कवे॒ मन्द॑न्तु धृष्ण॒विन्द॑वः ।आ त्वा॑ प॒णिं यदीम॑हे॥

kakuhaṃ cittvā kave mandantu dhṛṣṇavindavaḥ |ā tvā paṇiṃ yadīmahe ||

यस्ते॑ रे॒वाँ अदा॑शुरिः प्रम॒मर्ष॑ म॒घत्त॑ये ।तस्य॑ नो॒ वेद॒ आ भ॑र॥

yaste revām̐ adāśuriḥ pramamarṣa maghattaye |tasya no veda ā bhara ||

इ॒म उ॑ त्वा॒ वि च॑क्षते॒ सखा॑य इन्द्र सो॒मिन॑: ।पु॒ष्टाव॑न्तो॒ यथा॑ प॒शुम्॥

ima u tvā vi cakṣate sakhāya indra somina: |puṣṭāvanto yathā paśum ||

उ॒त त्वाब॑धिरं व॒यं श्रुत्क॑र्णं॒ सन्त॑मू॒तये॑ ।दू॒रादि॒ह ह॑वामहे॥

uta tvābadhiraṃ vayaṃ śrutkarṇaṃ santamūtaye |dūrādiha havāmahe ||

यच्छु॑श्रू॒या इ॒मं हवं॑ दु॒र्मर्षं॑ चक्रिया उ॒त ।भवे॑रा॒पिर्नो॒ अन्त॑मः॥

yacchuśrūyā imaṃ havaṃ durmarṣaṃ cakriyā uta |bhaverāpirno antamaḥ ||

यच्चि॒द्धि ते॒ अपि॒ व्यथि॑र्जग॒न्वांसो॒ अम॑न्महि ।गो॒दा इदि॑न्द्र बोधि नः॥

yacciddhi te api vyathirjaganvāṃso amanmahi |godā idindra bodhi naḥ ||

आ त्वा॑ र॒म्भं न जिव्र॑यो रर॒भ्मा श॑वसस्पते ।उ॒श्मसि॑ त्वा स॒धस्थ॒ आ॥

ā tvā rambhaṃ na jivrayo rarabhmā śavasaspate |uśmasi tvā sadhastha ā ||

स्तो॒त्रमिन्द्रा॑य गायत पुरुनृ॒म्णाय॒ सत्व॑ने ।नकि॒र्यं वृ॑ण्व॒ते यु॒धि॥

stotramindrāya gāyata purunṛmṇāya satvane |nakiryaṃ vṛṇvate yudhi ||

अ॒भि त्वा॑ वृषभा सु॒ते सु॒तं सृ॑जामि पी॒तये॑ ।तृ॒म्पा व्य॑श्नुही॒ मद॑म्॥

abhi tvā vṛṣabhā sute sutaṃ sṛjāmi pītaye |tṛmpā vyaśnuhī madam ||

मा त्वा॑ मू॒रा अ॑वि॒ष्यवो॒ मोप॒हस्वा॑न॒ आ द॑भन् ।माकीं॑ ब्रह्म॒द्विषो॑ वनः॥

mā tvā mūrā aviṣyavo mopahasvāna ā dabhan |mākīṃ brahmadviṣo vanaḥ ||

इ॒ह त्वा॒ गोप॑रीणसा म॒हे म॑न्दन्तु॒ राध॑से ।सरो॑ गौ॒रो यथा॑ पिब॥

iha tvā goparīṇasā mahe mandantu rādhase |saro gauro yathā piba ||

या वृ॑त्र॒हा प॑रा॒वति॒ सना॒ नवा॑ च चुच्यु॒वे ।ता सं॒सत्सु॒ प्र वो॑चत॥

yā vṛtrahā parāvati sanā navā ca cucyuve |tā saṃsatsu pra vocata ||

अपि॑बत्क॒द्रुव॑: सु॒तमिन्द्र॑: स॒हस्र॑बाह्वे ।अत्रा॑देदिष्ट॒ पौंस्य॑म्॥

apibatkadruva: sutamindra: sahasrabāhve |atrādediṣṭa pauṃsyam ||

स॒त्यं तत्तु॒र्वशे॒ यदौ॒ विदा॑नो अह्नवा॒य्यम् ।व्या॑नट् तु॒र्वणे॒ शमि॑॥

satyaṃ tatturvaśe yadau vidāno ahnavāyyam |vyānaṭ turvaṇe śami ||

त॒रणिं॑ वो॒ जना॑नां त्र॒दं वाज॑स्य॒ गोम॑तः ।स॒मा॒नमु॒ प्र शं॑सिषम्॥

taraṇiṃ vo janānāṃ tradaṃ vājasya gomataḥ |samānamu pra śaṃsiṣam ||

ऋ॒भु॒क्षणं॒ न वर्त॑व उ॒क्थेषु॑ तुग्र्या॒वृध॑म् ।इन्द्रं॒ सोमे॒ सचा॑ सु॒ते॥

ṛbhukṣaṇaṃ na vartava uktheṣu tugryāvṛdham |indraṃ some sacā sute ||

यः कृ॒न्तदिद्वि यो॒न्यं त्रि॒शोका॑य गि॒रिं पृ॒थुम् ।गोभ्यो॑ गा॒तुं निरे॑तवे॥

yaḥ kṛntadidvi yonyaṃ triśokāya giriṃ pṛthum |gobhyo gātuṃ niretave ||

यद्द॑धि॒षे म॑न॒स्यसि॑ मन्दा॒नः प्रेदिय॑क्षसि ।मा तत्क॑रिन्द्र मृ॒ळय॑॥

yaddadhiṣe manasyasi mandānaḥ prediyakṣasi |mā tatkarindra mṛḷaya ||

द॒भ्रं चि॒द्धि त्वाव॑तः कृ॒तं शृ॒ण्वे अधि॒ क्षमि॑ ।जिगा॑त्विन्द्र ते॒ मन॑:॥

dabhraṃ ciddhi tvāvataḥ kṛtaṃ śṛṇve adhi kṣami |jigātvindra te mana: ||

तवेदु॒ ताः सु॑की॒र्तयोऽस॑न्नु॒त प्रश॑स्तयः ।यदि॑न्द्र मृ॒ळया॑सि नः॥

tavedu tāḥ sukīrtayo'sannuta praśastayaḥ |yadindra mṛḷayāsi naḥ ||

मा न॒ एक॑स्मि॒न्नाग॑सि॒ मा द्वयो॑रु॒त त्रि॒षु ।वधी॒र्मा शू॑र॒ भूरि॑षु॥

mā na ekasminnāgasi mā dvayoruta triṣu |vadhīrmā śūra bhūriṣu ||

बि॒भया॒ हि त्वाव॑त उ॒ग्राद॑भिप्रभ॒ङ्गिण॑: ।द॒स्माद॒हमृ॑ती॒षह॑:॥

bibhayā hi tvāvata ugrādabhiprabhaṅgiṇa: |dasmādahamṛtīṣaha: ||

मा सख्यु॒: शून॒मा वि॑दे॒ मा पु॒त्रस्य॑ प्रभूवसो ।आ॒वृत्व॑द्भूतु ते॒ मन॑:॥

mā sakhyu: śūnamā vide mā putrasya prabhūvaso |āvṛtvadbhūtu te mana: ||

को नु म॑र्या॒ अमि॑थित॒: सखा॒ सखा॑यमब्रवीत् ।ज॒हा को अ॒स्मदी॑षते॥

ko nu maryā amithita: sakhā sakhāyamabravīt |jahā ko asmadīṣate ||

ए॒वारे॑ वृषभा सु॒तेऽसि॑न्व॒न्भूर्या॑वयः ।श्व॒घ्नीव॑ नि॒वता॒ चर॑न्॥

evāre vṛṣabhā sute'sinvanbhūryāvayaḥ |śvaghnīva nivatā caran ||

आ त॑ ए॒ता व॑चो॒युजा॒ हरी॑ गृभ्णे सु॒मद्र॑था ।यदीं॑ ब्र॒ह्मभ्य॒ इद्दद॑:॥

ā ta etā vacoyujā harī gṛbhṇe sumadrathā |yadīṃ brahmabhya iddada: ||

भि॒न्धि विश्वा॒ अप॒ द्विष॒: परि॒ बाधो॑ ज॒ही मृध॑: ।वसु॑ स्पा॒र्हं तदा भ॑र॥

bhindhi viśvā apa dviṣa: pari bādho jahī mṛdha: |vasu spārhaṃ tadā bhara ||

यद्वी॒ळावि॑न्द्र॒ यत्स्थि॒रे यत्पर्शा॑ने॒ परा॑भृतम् ।वसु॑ स्पा॒र्हं तदा भ॑र॥

yadvīḷāvindra yatsthire yatparśāne parābhṛtam |vasu spārhaṃ tadā bhara ||

यस्य॑ ते वि॒श्वमा॑नुषो॒ भूरे॑र्द॒त्तस्य॒ वेद॑ति ।वसु॑ स्पा॒र्हं तदा भ॑र॥

yasya te viśvamānuṣo bhūrerdattasya vedati |vasu spārhaṃ tadā bhara ||