Mandala.Sukta 8.91

आत्रेयी अपाला । इन्द्र: । अनुष्टुप् , १-२ पंक्ति: । · ātreyī apālā | indra: | anuṣṭup , 1-2 paṃkti: |

क॒न्या॒३ वार॑वाय॒ती सोम॒मपि॑ स्रु॒तावि॑दत् ।अस्तं॒ भर॑न्त्यब्रवी॒दिन्द्रा॑य सुनवै त्वा श॒क्राय॑ सुनवै त्वा॥

kanyā3 vāravāyatī somamapi srutāvidat |astaṃ bharantyabravīdindrāya sunavai tvā śakrāya sunavai tvā ||

अ॒सौ य एषि॑ वीर॒को गृ॒हंगृ॑हं वि॒चाक॑शद् ।इ॒मं जम्भ॑सुतं पिब धा॒नाव॑न्तं कर॒म्भिण॑मपू॒पव॑न्तमु॒क्थिन॑म्॥

asau ya eṣi vīrako gṛhaṃgṛhaṃ vicākaśad |imaṃ jambhasutaṃ piba dhānāvantaṃ karambhiṇamapūpavantamukthinam ||

आ च॒न त्वा॑ चिकित्सा॒मोऽधि॑ च॒न त्वा॒ नेम॑सि ।शनै॑रिव शन॒कैरि॒वेन्द्रा॑येन्दो॒ परि॑ स्रव॥

ā cana tvā cikitsāmo'dhi cana tvā nemasi |śanairiva śanakairivendrāyendo pari srava ||

कु॒विच्छक॑त्कु॒वित्कर॑त्कु॒विन्नो॒ वस्य॑स॒स्कर॑त् ।कु॒वित्प॑ति॒द्विषो॑ य॒तीरिन्द्रे॑ण सं॒गमा॑महै॥

kuvicchakatkuvitkaratkuvinno vasyasaskarat |kuvitpatidviṣo yatīrindreṇa saṃgamāmahai ||

इ॒मानि॒ त्रीणि॑ वि॒ष्टपा॒ तानी॑न्द्र॒ वि रो॑हय ।शिर॑स्त॒तस्यो॒र्वरा॒मादि॒दं म॒ उपो॒दरे॑॥

imāni trīṇi viṣṭapā tānīndra vi rohaya |śirastatasyorvarāmādidaṃ ma upodare ||

अ॒सौ च॒ या न॑ उ॒र्वरादि॒मां त॒न्वं१ मम॑ ।अथो॑ त॒तस्य॒ यच्छिर॒: सर्वा॒ ता रो॑म॒शा कृ॑धि॥

asau ca yā na urvarādimāṃ tanvaṃ1 mama |atho tatasya yacchira: sarvā tā romaśā kṛdhi ||

खे रथ॑स्य॒ खेऽन॑स॒: खे यु॒गस्य॑ शतक्रतो ।अ॒पा॒लामि॑न्द्र॒ त्रिष्पू॒त्व्यकृ॑णो॒: सूर्य॑त्वचम्॥

khe rathasya khe'nasa: khe yugasya śatakrato |apālāmindra triṣpūtvyakṛṇo: sūryatvacam ||