Mandala.Sukta 8.92

श्रुतकक्ष: सुकक्षो वा आङ्गिरस: ।इन्द्र: । गायत्री , १ अनुष्टुप् । · śrutakakṣa: sukakṣo vā āṅgirasa: |indra: | gāyatrī , 1 anuṣṭup |

पान्त॒मा वो॒ अन्ध॑स॒ इन्द्र॑म॒भि प्र गा॑यत ।वि॒श्वा॒साहं॑ श॒तक्र॑तुं॒ मंहि॑ष्ठं चर्षणी॒नाम्॥

pāntamā vo andhasa indramabhi pra gāyata |viśvāsāhaṃ śatakratuṃ maṃhiṣṭhaṃ carṣaṇīnām ||

पु॒रु॒हू॒तं पु॑रुष्टु॒तं गा॑था॒न्यं१ सन॑श्रुतम् ।इन्द्र॒ इति॑ ब्रवीतन॥

puruhūtaṃ puruṣṭutaṃ gāthānyaṃ1 sanaśrutam |indra iti bravītana ||

इन्द्र॒ इन्नो॑ म॒हानां॑ दा॒ता वाजा॑नां नृ॒तुः ।म॒हाँ अ॑भि॒ज्ञ्वा य॑मत्॥

indra inno mahānāṃ dātā vājānāṃ nṛtuḥ |mahām̐ abhijñvā yamat ||

अपा॑दु शि॒प्र्यन्ध॑सः सु॒दक्ष॑स्य प्रहो॒षिण॑: ।इन्दो॒रिन्द्रो॒ यवा॑शिरः॥

apādu śipryandhasaḥ sudakṣasya prahoṣiṇa: |indorindro yavāśiraḥ ||

तम्व॒भि प्रार्च॒तेन्द्रं॒ सोम॑स्य पी॒तये॑ ।तदिद्ध्य॑स्य॒ वर्ध॑नम्॥

tamvabhi prārcatendraṃ somasya pītaye |tadiddhyasya vardhanam ||

अ॒स्य पी॒त्वा मदा॑नां दे॒वो दे॒वस्यौज॑सा ।विश्वा॒भि भुव॑ना भुवत्॥

asya pītvā madānāṃ devo devasyaujasā |viśvābhi bhuvanā bhuvat ||

त्यमु॑ वः सत्रा॒साहं॒ विश्वा॑सु गी॒र्ष्वाय॑तम् ।आ च्या॑वयस्यू॒तये॑॥

tyamu vaḥ satrāsāhaṃ viśvāsu gīrṣvāyatam |ā cyāvayasyūtaye ||

यु॒ध्मं सन्त॑मन॒र्वाणं॑ सोम॒पामन॑पच्युतम् ।नर॑मवा॒र्यक्र॑तुम्॥

yudhmaṃ santamanarvāṇaṃ somapāmanapacyutam |naramavāryakratum ||

शिक्षा॑ ण इन्द्र रा॒य आ पु॒रु वि॒द्वाँ ऋ॑चीषम ।अवा॑ न॒: पार्ये॒ धने॑॥

śikṣā ṇa indra rāya ā puru vidvām̐ ṛcīṣama |avā na: pārye dhane ||

अत॑श्चिदिन्द्र ण॒ उपा ऽऽया॑हि श॒तवा॑जया ।इ॒षा स॒हस्र॑वाजया॥

ataścidindra ṇa upā ''yāhi śatavājayā |iṣā sahasravājayā ||

अया॑म॒ धीव॑तो॒ धियोऽर्व॑द्भिः शक्र गोदरे ।जये॑म पृ॒त्सु व॑ज्रिवः॥

ayāma dhīvato dhiyo'rvadbhiḥ śakra godare |jayema pṛtsu vajrivaḥ ||

व॒यमु॑ त्वा शतक्रतो॒ गावो॒ न यव॑से॒ष्वा ।उ॒क्थेषु॑ रणयामसि॥

vayamu tvā śatakrato gāvo na yavaseṣvā |uktheṣu raṇayāmasi ||

विश्वा॒ हि म॑र्त्यत्व॒नाऽनु॑का॒मा श॑तक्रतो ।अग॑न्म वज्रिन्ना॒शस॑:॥

viśvā hi martyatvanā'nukāmā śatakrato |aganma vajrinnāśasa: ||

त्वे सु पु॑त्र शव॒सोऽवृ॑त्र॒न्काम॑कातयः ।न त्वामि॒न्द्राति॑ रिच्यते॥

tve su putra śavaso'vṛtrankāmakātayaḥ |na tvāmindrāti ricyate ||

स नो॑ वृष॒न्त्सनि॑ष्ठया॒ सं घो॒रया॑ द्रवि॒त्न्वा ।धि॒यावि॑ड्ढि॒ पुरं॑ध्या॥

sa no vṛṣantsaniṣṭhayā saṃ ghorayā dravitnvā |dhiyāviḍḍhi puraṃdhyā ||

यस्ते॑ नू॒नं श॑तक्रत॒विन्द्र॑ द्यु॒म्नित॑मो॒ मद॑: ।तेन॑ नू॒नं मदे॑ मदेः॥

yaste nūnaṃ śatakratavindra dyumnitamo mada: |tena nūnaṃ made madeḥ ||

यस्ते॑ चि॒त्रश्र॑वस्तमो॒ य इ॑न्द्र वृत्र॒हन्त॑मः ।य ओ॑जो॒दात॑मो॒ मद॑:॥

yaste citraśravastamo ya indra vṛtrahantamaḥ |ya ojodātamo mada: ||

वि॒द्मा हि यस्ते॑ अद्रिव॒स्त्वाद॑त्तः सत्य सोमपाः ।विश्वा॑सु दस्म कृ॒ष्टिषु॑॥

vidmā hi yaste adrivastvādattaḥ satya somapāḥ |viśvāsu dasma kṛṣṭiṣu ||

इन्द्रा॑य॒ मद्व॑ने सु॒तं परि॑ ष्टोभन्तु नो॒ गिर॑: ।अ॒र्कम॑र्चन्तु का॒रव॑:॥

indrāya madvane sutaṃ pari ṣṭobhantu no gira: |arkamarcantu kārava: ||

यस्मि॒न्विश्वा॒ अधि॒ श्रियो॒ रण॑न्ति स॒प्त सं॒सद॑: ।इन्द्रं॑ सु॒ते ह॑वामहे॥

yasminviśvā adhi śriyo raṇanti sapta saṃsada: |indraṃ sute havāmahe ||

त्रिक॑द्रुकेषु॒ चेत॑नं दे॒वासो॑ य॒ज्ञम॑त्नत ।तमिद्व॑र्धन्तु नो॒ गिर॑:॥

trikadrukeṣu cetanaṃ devāso yajñamatnata |tamidvardhantu no gira: ||

आ त्वा॑ विश॒न्त्विन्द॑वः समु॒द्रमि॑व॒ सिन्ध॑वः ।न त्वामि॒न्द्राति॑ रिच्यते॥

ā tvā viśantvindavaḥ samudramiva sindhavaḥ |na tvāmindrāti ricyate ||

वि॒व्यक्थ॑ महि॒ना वृ॑षन्भ॒क्षं सोम॑स्य जागृवे ।य इ॑न्द्र ज॒ठरे॑षु ते॥

vivyaktha mahinā vṛṣanbhakṣaṃ somasya jāgṛve |ya indra jaṭhareṣu te ||

अरं॑ त इन्द्र कु॒क्षये॒ सोमो॑ भवतु वृत्रहन् ।अरं॒ धाम॑भ्य॒ इन्द॑वः॥

araṃ ta indra kukṣaye somo bhavatu vṛtrahan |araṃ dhāmabhya indavaḥ ||

अर॒मश्वा॑य गायति श्रु॒तक॑क्षो॒ अरं॒ गवे॑ ।अर॒मिन्द्र॑स्य॒ धाम्ने॑॥

aramaśvāya gāyati śrutakakṣo araṃ gave |aramindrasya dhāmne ||

अरं॒ हि ष्म॑ सु॒तेषु॑ ण॒: सोमे॑ष्विन्द्र॒ भूष॑सि ।अरं॑ ते शक्र दा॒वने॑॥

araṃ hi ṣma suteṣu ṇa: someṣvindra bhūṣasi |araṃ te śakra dāvane ||

प॒रा॒कात्ता॑च्चिदद्रिव॒स्त्वां न॑क्षन्त नो॒ गिर॑: ।अरं॑ गमाम ते व॒यम्॥

parākāttāccidadrivastvāṃ nakṣanta no gira: |araṃ gamāma te vayam ||

ए॒वा ह्यसि॑ वीर॒युरे॒वा शूर॑ उ॒त स्थि॒रः ।ए॒वा ते॒ राध्यं॒ मन॑:॥

evā hyasi vīrayurevā śūra uta sthiraḥ |evā te rādhyaṃ mana: ||

ए॒वा रा॒तिस्तु॑वीमघ॒ विश्वे॑भिर्धायि धा॒तृभि॑: ।अधा॑ चिदिन्द्र मे॒ सचा॑॥

evā rātistuvīmagha viśvebhirdhāyi dhātṛbhi: |adhā cidindra me sacā ||

मो षु ब्र॒ह्मेव॑ तन्द्र॒युर्भुवो॑ वाजानां पते ।मत्स्वा॑ सु॒तस्य॒ गोम॑तः॥

mo ṣu brahmeva tandrayurbhuvo vājānāṃ pate |matsvā sutasya gomataḥ ||

मा न॑ इन्द्रा॒भ्या॒३दिश॒: सूरो॑ अ॒क्तुष्वा य॑मन् ।त्वा यु॒जा व॑नेम॒ तत्॥

mā na indrābhyā3diśa: sūro aktuṣvā yaman |tvā yujā vanema tat ||

त्वयेदि॑न्द्र यु॒जा व॒यं प्रति॑ ब्रुवीमहि॒ स्पृध॑: ।त्वम॒स्माकं॒ तव॑ स्मसि॥

tvayedindra yujā vayaṃ prati bruvīmahi spṛdha: |tvamasmākaṃ tava smasi ||

त्वामिद्धि त्वा॒यवो॑ऽनु॒नोनु॑वत॒श्चरा॑न् ।सखा॑य इन्द्र का॒रव॑:॥

tvāmiddhi tvāyavo'nunonuvataścarān |sakhāya indra kārava: ||