Mandala.Sukta 9.1

मधुच्छन्दा वैश्वामित्र:। पवमान: सोम: । गायत्री । · madhucchandā vaiśvāmitra: | pavamāna: soma: | gāyatrī |

स्वादि॑ष्ठया॒ मदि॑ष्ठया॒ पव॑स्व सोम॒ धार॑या ।इन्द्रा॑य॒ पात॑वे सु॒तः॥

svādiṣṭhayā madiṣṭhayā pavasva soma dhārayā |indrāya pātave sutaḥ ||

र॒क्षो॒हा वि॒श्वच॑र्षणिर॒भि योनि॒मयो॑हतम् ।द्रुणा॑ स॒धस्थ॒मास॑दत्॥

rakṣohā viśvacarṣaṇirabhi yonimayohatam |druṇā sadhasthamāsadat ||

व॒रि॒वो॒धात॑मो भव॒ मंहि॑ष्ठो वृत्र॒हन्त॑मः ।पर्षि॒ राधो॑ म॒घोना॑म्॥

varivodhātamo bhava maṃhiṣṭho vṛtrahantamaḥ |parṣi rādho maghonām ||

अ॒भ्य॑र्ष म॒हानां॑ दे॒वानां॑ वी॒तिमन्ध॑सा ।अ॒भि वाज॑मु॒त श्रव॑:॥

abhyarṣa mahānāṃ devānāṃ vītimandhasā |abhi vājamuta śrava: ||

त्वामच्छा॑ चरामसि॒ तदिदर्थं॑ दि॒वेदि॑वे ।इन्दो॒ त्वे न॑ आ॒शस॑:॥

tvāmacchā carāmasi tadidarthaṃ divedive |indo tve na āśasa: ||

पु॒नाति॑ ते परि॒स्रुतं॒ सोमं॒ सूर्य॑स्य दुहि॒ता ।वारे॑ण॒ शश्व॑ता॒ तना॑॥

punāti te parisrutaṃ somaṃ sūryasya duhitā |vāreṇa śaśvatā tanā ||

तमी॒मण्वी॑: सम॒र्य आ गृ॒भ्णन्ति॒ योष॑णो॒ दश॑ ।स्वसा॑र॒: पार्ये॑ दि॒वि॥

tamīmaṇvī: samarya ā gṛbhṇanti yoṣaṇo daśa |svasāra: pārye divi ||

तमीं॑ हिन्वन्त्य॒ग्रुवो॒ धम॑न्ति बाकु॒रं दृति॑म् ।त्रि॒धातु॑ वार॒णं मधु॑॥

tamīṃ hinvantyagruvo dhamanti bākuraṃ dṛtim |tridhātu vāraṇaṃ madhu ||

अ॒भी॒३ममघ्न्या॑ उ॒त श्री॒णन्ति॑ धे॒नव॒: शिशु॑म् ।सोम॒मिन्द्रा॑य॒ पात॑वे॥

abhī3mamaghnyā uta śrīṇanti dhenava: śiśum |somamindrāya pātave ||

अ॒स्येदिन्द्रो॒ मदे॒ष्वा विश्वा॑ वृ॒त्राणि॑ जिघ्नते ।शूरो॑ म॒घा च॑ मंहते॥

asyedindro madeṣvā viśvā vṛtrāṇi jighnate |śūro maghā ca maṃhate ||