Mandala.Sukta 9.2

मेधातिथि: काण्व: । पवमान: सोम: । गायत्री । · medhātithi: kāṇva: | pavamāna: soma: | gāyatrī |

पव॑स्व देव॒वीरति॑ प॒वित्रं॑ सोम॒ रंह्या॑ ।इन्द्र॑मिन्दो॒ वृषा वि॑श॥

pavasva devavīrati pavitraṃ soma raṃhyā |indramindo vṛṣā viśa ||

आ व॑च्यस्व॒ महि॒ प्सरो॒ वृषे॑न्दो द्यु॒म्नव॑त्तमः ।आ योनिं॑ धर्ण॒सिः स॑दः॥

ā vacyasva mahi psaro vṛṣendo dyumnavattamaḥ |ā yoniṃ dharṇasiḥ sadaḥ ||

अधु॑क्षत प्रि॒यं मधु॒ धारा॑ सु॒तस्य॑ वे॒धस॑: ।अ॒पो व॑सिष्ट सु॒क्रतु॑:॥

adhukṣata priyaṃ madhu dhārā sutasya vedhasa: |apo vasiṣṭa sukratu: ||

म॒हान्तं॑ त्वा म॒हीरन्वापो॑ अर्षन्ति॒ सिन्ध॑वः ।यद्गोभि॑र्वासयि॒ष्यसे॑॥

mahāntaṃ tvā mahīranvāpo arṣanti sindhavaḥ |yadgobhirvāsayiṣyase ||

स॒मु॒द्रो अ॒प्सु मा॑मृजे विष्ट॒म्भो ध॒रुणो॑ दि॒वः ।सोम॑: प॒वित्रे॑ अस्म॒युः॥

samudro apsu māmṛje viṣṭambho dharuṇo divaḥ |soma: pavitre asmayuḥ ||

अचि॑क्रद॒द्वृषा॒ हरि॑र्म॒हान्मि॒त्रो न द॑र्श॒तः ।सं सूर्ये॑ण रोचते॥

acikradadvṛṣā harirmahānmitro na darśataḥ |saṃ sūryeṇa rocate ||

गिर॑स्त इन्द॒ ओज॑सा मर्मृ॒ज्यन्ते॑ अप॒स्युव॑: ।याभि॒र्मदा॑य॒ शुम्भ॑से॥

girasta inda ojasā marmṛjyante apasyuva: |yābhirmadāya śumbhase ||

तं त्वा॒ मदा॑य॒ घृष्व॑य उ लोककृ॒त्नुमी॑महे ।तव॒ प्रश॑स्तयो म॒हीः॥

taṃ tvā madāya ghṛṣvaya u lokakṛtnumīmahe |tava praśastayo mahīḥ ||

अ॒स्मभ्य॑मिन्दविन्द्र॒युर्मध्व॑: पवस्व॒ धार॑या ।प॒र्जन्यो॑ वृष्टि॒माँ इ॑व॥

asmabhyamindavindrayurmadhva: pavasva dhārayā |parjanyo vṛṣṭimām̐ iva ||

गो॒षा इ॑न्दो नृ॒षा अ॑स्यश्व॒सा वा॑ज॒सा उ॒त ।आ॒त्मा य॒ज्ञस्य॑ पू॒र्व्यः॥

goṣā indo nṛṣā asyaśvasā vājasā uta |ātmā yajñasya pūrvyaḥ ||