Mandala.Sukta 9.3

आजीगर्ति: शुन: शेप :, कृत्रिमो वैश्वामित्रो देवरात: । पवमान: सोम: । गायत्री । · ājīgarti: śuna: śepa :, kṛtrimo vaiśvāmitro devarāta: | pavamāna: soma: | gāyatrī |

ए॒ष दे॒वो अम॑र्त्यः पर्ण॒वीरि॑व दीयति ।अ॒भि द्रोणा॑न्या॒सद॑म्॥

eṣa devo amartyaḥ parṇavīriva dīyati |abhi droṇānyāsadam ||

ए॒ष दे॒वो वि॒पा कृ॒तोऽति॒ ह्वरां॑सि धावति ।पव॑मानो॒ अदा॑भ्यः॥

eṣa devo vipā kṛto'ti hvarāṃsi dhāvati |pavamāno adābhyaḥ ||

ए॒ष दे॒वो वि॑प॒न्युभि॒: पव॑मान ऋता॒युभि॑: ।हरि॒र्वाजा॑य मृज्यते॥

eṣa devo vipanyubhi: pavamāna ṛtāyubhi: |harirvājāya mṛjyate ||

ए॒ष विश्वा॑नि॒ वार्या॒ शूरो॒ यन्नि॑व॒ सत्व॑भिः ।पव॑मानः सिषासति॥

eṣa viśvāni vāryā śūro yanniva satvabhiḥ |pavamānaḥ siṣāsati ||

ए॒ष दे॒वो र॑थर्यति॒ पव॑मानो दशस्यति ।आ॒विष्कृ॑णोति वग्व॒नुम्॥

eṣa devo ratharyati pavamāno daśasyati |āviṣkṛṇoti vagvanum ||

ए॒ष विप्रै॑र॒भिष्टु॑तो॒ऽपो दे॒वो वि गा॑हते ।दध॒द्रत्ना॑नि दा॒शुषे॑॥

eṣa viprairabhiṣṭuto'po devo vi gāhate |dadhadratnāni dāśuṣe ||

ए॒ष दिवं॒ वि धा॑वति ति॒रो रजां॑सि॒ धार॑या ।पव॑मान॒: कनि॑क्रदत्॥

eṣa divaṃ vi dhāvati tiro rajāṃsi dhārayā |pavamāna: kanikradat ||

ए॒ष दिवं॒ व्यास॑रत्ति॒रो रजां॒स्यस्पृ॑तः ।पव॑मानः स्वध्व॒रः॥

eṣa divaṃ vyāsarattiro rajāṃsyaspṛtaḥ |pavamānaḥ svadhvaraḥ ||

ए॒ष प्र॒त्नेन॒ जन्म॑ना दे॒वो दे॒वेभ्य॑: सु॒तः ।हरि॑: प॒वित्रे॑ अर्षति॥

eṣa pratnena janmanā devo devebhya: sutaḥ |hari: pavitre arṣati ||

ए॒ष उ॒ स्य पु॑रुव्र॒तो ज॑ज्ञा॒नो ज॒नय॒न्निष॑: ।धार॑या पवते सु॒तः॥

eṣa u sya puruvrato jajñāno janayanniṣa: |dhārayā pavate sutaḥ ||