Mandala.Sukta 9.86

(१-४८ ) १-१० अकृष्टा माषा:, ११-२० सिकता निवावरी, २१-३० पृश्नियोऽजा:, ३१-४० अकृष्टमाषादयस्त्रय:,४१-४५ भौमोऽत्रि:, ४६-४८ गृत्समद: शौनक: । पवमान: सोम: ।जगती । · (1-48 ) 1-10 akṛṣṭā māṣā:, 11-20 sikatā nivāvarī, 21-30 pṛśniyo'jā:, 31-40 akṛṣṭamāṣādayastraya:,41-45 bhaumo'tri:, 46-48 gṛtsamada: śaunaka: | pavamāna: soma: |jagatī |

प्र त॑ आ॒शव॑: पवमान धी॒जवो॒ मदा॑ अर्षन्ति रघु॒जा इ॑व॒ त्मना॑ ।दि॒व्याः सु॑प॒र्णा मधु॑मन्त॒ इन्द॑वो म॒दिन्त॑मास॒: परि॒ कोश॑मासते॥

pra ta āśava: pavamāna dhījavo madā arṣanti raghujā iva tmanā |divyāḥ suparṇā madhumanta indavo madintamāsa: pari kośamāsate ||

प्र ते॒ मदा॑सो मदि॒रास॑ आ॒शवोऽसृ॑क्षत॒ रथ्या॑सो॒ यथा॒ पृथ॑क् ।धे॒नुर्न व॒त्सं पय॑सा॒भि व॒ज्रिण॒मिन्द्र॒मिन्द॑वो॒ मधु॑मन्त ऊ॒र्मय॑:॥

pra te madāso madirāsa āśavo'sṛkṣata rathyāso yathā pṛthak |dhenurna vatsaṃ payasābhi vajriṇamindramindavo madhumanta ūrmaya: ||

अत्यो॒ न हि॑या॒नो अ॒भि वाज॑मर्ष स्व॒र्वित्कोशं॑ दि॒वो अद्रि॑मातरम् ।वृषा॑ प॒वित्रे॒ अधि॒ सानो॑ अ॒व्यये॒ सोम॑: पुना॒न इ॑न्द्रि॒याय॒ धाय॑से॥

atyo na hiyāno abhi vājamarṣa svarvitkośaṃ divo adrimātaram |vṛṣā pavitre adhi sāno avyaye soma: punāna indriyāya dhāyase ||

प्र त॒ आश्वि॑नीः पवमान धी॒जुवो॑ दि॒व्या अ॑सृग्र॒न्पय॑सा॒ धरी॑मणि ।प्रान्तॠष॑य॒: स्थावि॑रीरसृक्षत॒ ये त्वा॑ मृ॒जन्त्यृ॑षिषाण वे॒धस॑:॥

pra ta āśvinīḥ pavamāna dhījuvo divyā asṛgranpayasā dharīmaṇi |prāntaṝṣaya: sthāvirīrasṛkṣata ye tvā mṛjantyṛṣiṣāṇa vedhasa: ||

विश्वा॒ धामा॑नि विश्वचक्ष॒ ऋभ्व॑सः प्र॒भोस्ते॑ स॒तः परि॑ यन्ति के॒तव॑: ।व्या॒न॒शिः प॑वसे सोम॒ धर्म॑भि॒: पति॒र्विश्व॑स्य॒ भुव॑नस्य राजसि॥

viśvā dhāmāni viśvacakṣa ṛbhvasaḥ prabhoste sataḥ pari yanti ketava: |vyānaśiḥ pavase soma dharmabhi: patirviśvasya bhuvanasya rājasi ||

उ॒भ॒यत॒: पव॑मानस्य र॒श्मयो॑ ध्रु॒वस्य॑ स॒तः परि॑ यन्ति के॒तव॑: ।यदी॑ प॒वित्रे॒ अधि॑ मृ॒ज्यते॒ हरि॒: सत्ता॒ नि योना॑ क॒लशे॑षु सीदति॥

ubhayata: pavamānasya raśmayo dhruvasya sataḥ pari yanti ketava: |yadī pavitre adhi mṛjyate hari: sattā ni yonā kalaśeṣu sīdati ||

य॒ज्ञस्य॑ के॒तुः प॑वते स्वध्व॒रः सोमो॑ दे॒वाना॒मुप॑ याति निष्कृ॒तम् ।स॒हस्र॑धार॒: परि॒ कोश॑मर्षति॒ वृषा॑ प॒वित्र॒मत्ये॑ति॒ रोरु॑वत्॥

yajñasya ketuḥ pavate svadhvaraḥ somo devānāmupa yāti niṣkṛtam |sahasradhāra: pari kośamarṣati vṛṣā pavitramatyeti roruvat ||

राजा॑ समु॒द्रं न॒द्यो॒३ वि गा॑हते॒ऽपामू॒र्मिं स॑चते॒ सिन्धु॑षु श्रि॒तः ।अध्य॑स्था॒त्सानु॒ पव॑मानो अ॒व्ययं॒ नाभा॑ पृथि॒व्या ध॒रुणो॑ म॒हो दि॒वः॥

rājā samudraṃ nadyo3 vi gāhate'pāmūrmiṃ sacate sindhuṣu śritaḥ |adhyasthātsānu pavamāno avyayaṃ nābhā pṛthivyā dharuṇo maho divaḥ ||

दि॒वो न सानु॑ स्त॒नय॑न्नचिक्रद॒द्द्यौश्च॒ यस्य॑ पृथि॒वी च॒ धर्म॑भिः ।इन्द्र॑स्य स॒ख्यं प॑वते वि॒वेवि॑द॒त्सोम॑: पुना॒नः क॒लशे॑षु सीदति॥

divo na sānu stanayannacikradaddyauśca yasya pṛthivī ca dharmabhiḥ |indrasya sakhyaṃ pavate vivevidatsoma: punānaḥ kalaśeṣu sīdati ||

ज्योति॑र्य॒ज्ञस्य॑ पवते॒ मधु॑ प्रि॒यं पि॒ता दे॒वानां॑ जनि॒ता वि॒भूव॑सुः ।दधा॑ति॒ रत्नं॑ स्व॒धयो॑रपी॒च्यं॑ म॒दिन्त॑मो मत्स॒र इ॑न्द्रि॒यो रस॑:॥

jyotiryajñasya pavate madhu priyaṃ pitā devānāṃ janitā vibhūvasuḥ |dadhāti ratnaṃ svadhayorapīcyaṃ madintamo matsara indriyo rasa: ||

अ॒भि॒क्रन्द॑न्क॒लशं॑ वा॒ज्य॑र्षति॒ पति॑र्दि॒वः श॒तधा॑रो विचक्ष॒णः ।हरि॑र्मि॒त्रस्य॒ सद॑नेषु सीदति मर्मृजा॒नोऽवि॑भि॒: सिन्धु॑भि॒र्वृषा॑॥

abhikrandankalaśaṃ vājyarṣati patirdivaḥ śatadhāro vicakṣaṇaḥ |harirmitrasya sadaneṣu sīdati marmṛjāno'vibhi: sindhubhirvṛṣā ||

अग्रे॒ सिन्धू॑नां॒ पव॑मानो अर्ष॒त्यग्रे॑ वा॒चो अ॑ग्रि॒यो गोषु॑ गच्छति ।अग्रे॒ वाज॑स्य भजते महाध॒नं स्वा॑यु॒धः सो॒तृभि॑: पूयते॒ वृषा॑॥

agre sindhūnāṃ pavamāno arṣatyagre vāco agriyo goṣu gacchati |agre vājasya bhajate mahādhanaṃ svāyudhaḥ sotṛbhi: pūyate vṛṣā ||

अ॒यं म॒तवा॑ञ्छकु॒नो यथा॑ हि॒तोऽव्ये॑ ससार॒ पव॑मान ऊ॒र्मिणा॑ ।तव॒ क्रत्वा॒ रोद॑सी अन्त॒रा क॑वे॒ शुचि॑र्धि॒या प॑वते॒ सोम॑ इन्द्र ते॥

ayaṃ matavāñchakuno yathā hito'vye sasāra pavamāna ūrmiṇā |tava kratvā rodasī antarā kave śucirdhiyā pavate soma indra te ||

द्रा॒पिं वसा॑नो यज॒तो दि॑वि॒स्पृश॑मन्तरिक्ष॒प्रा भुव॑ने॒ष्वर्पि॑तः ।स्व॑र्जज्ञा॒नो नभ॑सा॒भ्य॑क्रमीत्प्र॒त्नम॑स्य पि॒तर॒मा वि॑वासति॥

drāpiṃ vasāno yajato divispṛśamantarikṣaprā bhuvaneṣvarpitaḥ |svarjajñāno nabhasābhyakramītpratnamasya pitaramā vivāsati ||

सो अ॑स्य वि॒शे महि॒ शर्म॑ यच्छति॒ यो अ॑स्य॒ धाम॑ प्रथ॒मं व्या॑न॒शे ।प॒दं यद॑स्य पर॒मे व्यो॑म॒न्यतो॒ विश्वा॑ अ॒भि सं या॑ति सं॒यत॑:॥

so asya viśe mahi śarma yacchati yo asya dhāma prathamaṃ vyānaśe |padaṃ yadasya parame vyomanyato viśvā abhi saṃ yāti saṃyata: ||

प्रो अ॑यासी॒दिन्दु॒रिन्द्र॑स्य निष्कृ॒तं सखा॒ सख्यु॒र्न प्र मि॑नाति सं॒गिर॑म् ।मर्य॑ इव युव॒तिभि॒: सम॑र्षति॒ सोम॑: क॒लशे॑ श॒तया॑म्ना प॒था॥

pro ayāsīdindurindrasya niṣkṛtaṃ sakhā sakhyurna pra mināti saṃgiram |marya iva yuvatibhi: samarṣati soma: kalaśe śatayāmnā pathā ||

प्र वो॒ धियो॑ मन्द्र॒युवो॑ विप॒न्युव॑: पन॒स्युव॑: सं॒वस॑नेष्वक्रमुः ।सोमं॑ मनी॒षा अ॒भ्य॑नूषत॒ स्तुभो॒ऽभि धे॒नव॒: पय॑सेमशिश्रयुः॥

pra vo dhiyo mandrayuvo vipanyuva: panasyuva: saṃvasaneṣvakramuḥ |somaṃ manīṣā abhyanūṣata stubho'bhi dhenava: payasemaśiśrayuḥ ||

आ न॑: सोम सं॒यतं॑ पि॒प्युषी॒मिष॒मिन्दो॒ पव॑स्व॒ पव॑मानो अ॒स्रिध॑म् ।या नो॒ दोह॑ते॒ त्रिरह॒न्नस॑श्चुषी क्षु॒मद्वाज॑व॒न्मधु॑मत्सु॒वीर्य॑म्॥

ā na: soma saṃyataṃ pipyuṣīmiṣamindo pavasva pavamāno asridham |yā no dohate trirahannasaścuṣī kṣumadvājavanmadhumatsuvīryam ||

वृषा॑ मती॒नां प॑वते विचक्ष॒णः सोमो॒ अह्न॑: प्रतरी॒तोषसो॑ दि॒वः ।क्रा॒णा सिन्धू॑नां क॒लशाँ॑ अवीवश॒दिन्द्र॑स्य॒ हार्द्या॑वि॒शन्म॑नी॒षिभि॑:॥

vṛṣā matīnāṃ pavate vicakṣaṇaḥ somo ahna: pratarītoṣaso divaḥ |krāṇā sindhūnāṃ kalaśām̐ avīvaśadindrasya hārdyāviśanmanīṣibhi: ||

म॒नी॒षिभि॑: पवते पू॒र्व्यः क॒विर्नृभि॑र्य॒तः परि॒ कोशाँ॑ अचिक्रदत् ।त्रि॒तस्य॒ नाम॑ ज॒नय॒न्मधु॑ क्षर॒दिन्द्र॑स्य वा॒योः स॒ख्याय॒ कर्त॑वे॥

manīṣibhi: pavate pūrvyaḥ kavirnṛbhiryataḥ pari kośām̐ acikradat |tritasya nāma janayanmadhu kṣaradindrasya vāyoḥ sakhyāya kartave ||

अ॒यं पु॑ना॒न उ॒षसो॒ वि रो॑चयद॒यं सिन्धु॑भ्यो अभवदु लोक॒कृत् ।अ॒यं त्रिः स॒प्त दु॑दुहा॒न आ॒शिरं॒ सोमो॑ हृ॒दे प॑वते॒ चारु॑ मत्स॒रः॥

ayaṃ punāna uṣaso vi rocayadayaṃ sindhubhyo abhavadu lokakṛt |ayaṃ triḥ sapta duduhāna āśiraṃ somo hṛde pavate cāru matsaraḥ ||

पव॑स्व सोम दि॒व्येषु॒ धाम॑सु सृजा॒न इ॑न्दो क॒लशे॑ प॒वित्र॒ आ ।सीद॒न्निन्द्र॑स्य ज॒ठरे॒ कनि॑क्रद॒न्नृभि॑र्य॒तः सूर्य॒मारो॑हयो दि॒वि॥

pavasva soma divyeṣu dhāmasu sṛjāna indo kalaśe pavitra ā |sīdannindrasya jaṭhare kanikradannṛbhiryataḥ sūryamārohayo divi ||

अद्रि॑भिः सु॒तः प॑वसे प॒वित्र॒ आँ इन्द॒विन्द्र॑स्य ज॒ठरे॑ष्वावि॒शन् ।त्वं नृ॒चक्षा॑ अभवो विचक्षण॒ सोम॑ गो॒त्रमङ्गि॑रोभ्योऽवृणो॒रप॑॥

adribhiḥ sutaḥ pavase pavitra ām̐ indavindrasya jaṭhareṣvāviśan |tvaṃ nṛcakṣā abhavo vicakṣaṇa soma gotramaṅgirobhyo'vṛṇorapa ||

त्वां सो॑म॒ पव॑मानं स्वा॒ध्योऽनु॒ विप्रा॑सो अमदन्नव॒स्यव॑: ।त्वां सु॑प॒र्ण आभ॑रद्दि॒वस्परीन्दो॒ विश्वा॑भिर्म॒तिभि॒: परि॑ष्कृतम्॥

tvāṃ soma pavamānaṃ svādhyo'nu viprāso amadannavasyava: |tvāṃ suparṇa ābharaddivasparīndo viśvābhirmatibhi: pariṣkṛtam ||

अव्ये॑ पुना॒नं परि॒ वार॑ ऊ॒र्मिणा॒ हरिं॑ नवन्ते अ॒भि स॒प्त धे॒नव॑: ।अ॒पामु॒पस्थे॒ अध्या॒यव॑: क॒विमृ॒तस्य॒ योना॑ महि॒षा अ॑हेषत॥

avye punānaṃ pari vāra ūrmiṇā hariṃ navante abhi sapta dhenava: |apāmupasthe adhyāyava: kavimṛtasya yonā mahiṣā aheṣata ||

इन्दु॑: पुना॒नो अति॑ गाहते॒ मृधो॒ विश्वा॑नि कृ॒ण्वन्त्सु॒पथा॑नि॒ यज्य॑वे ।गाः कृ॑ण्वा॒नो नि॒र्णिजं॑ हर्य॒तः क॒विरत्यो॒ न क्रीळ॒न्परि॒ वार॑मर्षति॥

indu: punāno ati gāhate mṛdho viśvāni kṛṇvantsupathāni yajyave |gāḥ kṛṇvāno nirṇijaṃ haryataḥ kaviratyo na krīḷanpari vāramarṣati ||

अ॒स॒श्चत॑: श॒तधा॑रा अभि॒श्रियो॒ हरिं॑ नव॒न्तेऽव॒ ता उ॑द॒न्युव॑: ।क्षिपो॑ मृजन्ति॒ परि॒ गोभि॒रावृ॑तं तृ॒तीये॑ पृ॒ष्ठे अधि॑ रोच॒ने दि॒वः॥

asaścata: śatadhārā abhiśriyo hariṃ navante'va tā udanyuva: |kṣipo mṛjanti pari gobhirāvṛtaṃ tṛtīye pṛṣṭhe adhi rocane divaḥ ||

तवे॒माः प्र॒जा दि॒व्यस्य॒ रेत॑स॒स्त्वं विश्व॑स्य॒ भुव॑नस्य राजसि ।अथे॒दं विश्वं॑ पवमान ते॒ वशे॒ त्वमि॑न्दो प्रथ॒मो धा॑म॒धा अ॑सि॥

tavemāḥ prajā divyasya retasastvaṃ viśvasya bhuvanasya rājasi |athedaṃ viśvaṃ pavamāna te vaśe tvamindo prathamo dhāmadhā asi ||

त्वं स॑मु॒द्रो अ॑सि विश्व॒वित्क॑वे॒ तवे॒माः पञ्च॑ प्र॒दिशो॒ विध॑र्मणि ।त्वं द्यां च॑ पृथि॒वीं चाति॑ जभ्रिषे॒ तव॒ ज्योतीं॑षि पवमान॒ सूर्य॑:॥

tvaṃ samudro asi viśvavitkave tavemāḥ pañca pradiśo vidharmaṇi |tvaṃ dyāṃ ca pṛthivīṃ cāti jabhriṣe tava jyotīṃṣi pavamāna sūrya: ||

त्वं प॒वित्रे॒ रज॑सो॒ विध॑र्मणि दे॒वेभ्य॑: सोम पवमान पूयसे ।त्वामु॒शिज॑: प्रथ॒मा अ॑गृभ्णत॒ तुभ्ये॒मा विश्वा॒ भुव॑नानि येमिरे॥

tvaṃ pavitre rajaso vidharmaṇi devebhya: soma pavamāna pūyase |tvāmuśija: prathamā agṛbhṇata tubhyemā viśvā bhuvanāni yemire ||

प्र रे॒भ ए॒त्यति॒ वार॑म॒व्ययं॒ वृषा॒ वने॒ष्वव॑ चक्रद॒द्धरि॑: ।सं धी॒तयो॑ वावशा॒ना अ॑नूषत॒ शिशुं॑ रिहन्ति म॒तय॒: पनि॑प्नतम्॥

pra rebha etyati vāramavyayaṃ vṛṣā vaneṣvava cakradaddhari: |saṃ dhītayo vāvaśānā anūṣata śiśuṃ rihanti mataya: panipnatam ||

स सूर्य॑स्य र॒श्मिभि॒: परि॑ व्यत॒ तन्तुं॑ तन्वा॒नस्त्रि॒वृतं॒ यथा॑ वि॒दे ।नय॑न्नृ॒तस्य॑ प्र॒शिषो॒ नवी॑यसी॒: पति॒र्जनी॑ना॒मुप॑ याति निष्कृ॒तम्॥

sa sūryasya raśmibhi: pari vyata tantuṃ tanvānastrivṛtaṃ yathā vide |nayannṛtasya praśiṣo navīyasī: patirjanīnāmupa yāti niṣkṛtam ||

राजा॒ सिन्धू॑नां पवते॒ पति॑र्दि॒व ऋ॒तस्य॑ याति प॒थिभि॒: कनि॑क्रदत् ।स॒हस्र॑धार॒: परि॑ षिच्यते॒ हरि॑: पुना॒नो वाचं॑ ज॒नय॒न्नुपा॑वसुः॥

rājā sindhūnāṃ pavate patirdiva ṛtasya yāti pathibhi: kanikradat |sahasradhāra: pari ṣicyate hari: punāno vācaṃ janayannupāvasuḥ ||

पव॑मान॒ मह्यर्णो॒ वि धा॑वसि॒ सूरो॒ न चि॒त्रो अव्य॑यानि॒ पव्य॑या ।गभ॑स्तिपूतो॒ नृभि॒रद्रि॑भिः सु॒तो म॒हे वाजा॑य॒ धन्या॑य धन्वसि॥

pavamāna mahyarṇo vi dhāvasi sūro na citro avyayāni pavyayā |gabhastipūto nṛbhiradribhiḥ suto mahe vājāya dhanyāya dhanvasi ||

इष॒मूर्जं॑ पवमाना॒भ्य॑र्षसि श्ये॒नो न वंसु॑ क॒लशे॑षु सीदसि ।इन्द्रा॑य॒ मद्वा॒ मद्यो॒ मद॑: सु॒तो दि॒वो वि॑ष्ट॒म्भ उ॑प॒मो वि॑चक्ष॒णः॥

iṣamūrjaṃ pavamānābhyarṣasi śyeno na vaṃsu kalaśeṣu sīdasi |indrāya madvā madyo mada: suto divo viṣṭambha upamo vicakṣaṇaḥ ||

स॒प्त स्वसा॑रो अ॒भि मा॒तर॒: शिशुं॒ नवं॑ जज्ञा॒नं जेन्यं॑ विप॒श्चित॑म् ।अ॒पां ग॑न्ध॒र्वं दि॒व्यं नृ॒चक्ष॑सं॒ सोमं॒ विश्व॑स्य॒ भुव॑नस्य रा॒जसे॑॥

sapta svasāro abhi mātara: śiśuṃ navaṃ jajñānaṃ jenyaṃ vipaścitam |apāṃ gandharvaṃ divyaṃ nṛcakṣasaṃ somaṃ viśvasya bhuvanasya rājase ||

ई॒शा॒न इ॒मा भुव॑नानि॒ वीय॑से युजा॒न इ॑न्दो ह॒रित॑: सुप॒र्ण्य॑: ।तास्ते॑ क्षरन्तु॒ मधु॑मद्घृ॒तं पय॒स्तव॑ व्र॒ते सो॑म तिष्ठन्तु कृ॒ष्टय॑:॥

īśāna imā bhuvanāni vīyase yujāna indo harita: suparṇya: |tāste kṣarantu madhumadghṛtaṃ payastava vrate soma tiṣṭhantu kṛṣṭaya: ||

त्वं नृ॒चक्षा॑ असि सोम वि॒श्वत॒: पव॑मान वृषभ॒ ता वि धा॑वसि ।स न॑: पवस्व॒ वसु॑म॒द्धिर॑ण्यवद्व॒यं स्या॑म॒ भुव॑नेषु जी॒वसे॑॥

tvaṃ nṛcakṣā asi soma viśvata: pavamāna vṛṣabha tā vi dhāvasi |sa na: pavasva vasumaddhiraṇyavadvayaṃ syāma bhuvaneṣu jīvase ||

गो॒वित्प॑वस्व वसु॒विद्धि॑रण्य॒विद्रे॑तो॒धा इ॑न्दो॒ भुव॑ने॒ष्वर्पि॑तः ।त्वं सु॒वीरो॑ असि सोम विश्व॒वित्तं त्वा॒ विप्रा॒ उप॑ गि॒रेम आ॑सते॥

govitpavasva vasuviddhiraṇyavidretodhā indo bhuvaneṣvarpitaḥ |tvaṃ suvīro asi soma viśvavittaṃ tvā viprā upa girema āsate ||

उन्मध्व॑ ऊ॒र्मिर्व॒नना॑ अतिष्ठिपद॒पो वसा॑नो महि॒षो वि गा॑हते ।राजा॑ प॒वित्र॑रथो॒ वाज॒मारु॑हत्स॒हस्र॑भृष्टिर्जयति॒ श्रवो॑ बृ॒हत्॥

unmadhva ūrmirvananā atiṣṭhipadapo vasāno mahiṣo vi gāhate |rājā pavitraratho vājamāruhatsahasrabhṛṣṭirjayati śravo bṛhat ||

स भ॒न्दना॒ उदि॑यर्ति प्र॒जाव॑तीर्वि॒श्वायु॒र्विश्वा॑: सु॒भरा॒ अह॑र्दिवि ।ब्रह्म॑ प्र॒जाव॑द्र॒यिमश्व॑पस्त्यं पी॒त इ॑न्द॒विन्द्र॑म॒स्मभ्यं॑ याचतात्॥

sa bhandanā udiyarti prajāvatīrviśvāyurviśvā: subharā ahardivi |brahma prajāvadrayimaśvapastyaṃ pīta indavindramasmabhyaṃ yācatāt ||

सो अग्रे॒ अह्नां॒ हरि॑र्हर्य॒तो मद॒: प्र चेत॑सा चेतयत॒त अनु॒ द्युभि॑: ।द्वा जना॑ या॒तय॑न्न॒न्तरी॑यते॒ नरा॑ च॒ शंसं॒ दैव्यं॑ च ध॒र्तरि॑॥

so agre ahnāṃ harirharyato mada: pra cetasā cetayatata anu dyubhi: |dvā janā yātayannantarīyate narā ca śaṃsaṃ daivyaṃ ca dhartari ||

अ॒ञ्जते॒ व्य॑ञ्जते॒ सम॑ञ्जते॒ क्रतुं॑ रिहन्ति॒ मधु॑ना॒भ्य॑ञ्जते ।सिन्धो॑रुच्छ्वा॒से प॒तय॑न्तमु॒क्षणं॑ हिरण्यपा॒वाः प॒शुमा॑सु गृभ्णते॥

añjate vyañjate samañjate kratuṃ rihanti madhunābhyañjate |sindhorucchvāse patayantamukṣaṇaṃ hiraṇyapāvāḥ paśumāsu gṛbhṇate ||

वि॒प॒श्चिते॒ पव॑मानाय गायत म॒ही न धारात्यन्धो॑ अर्षति ।अहि॒र्न जू॒र्णामति॑ सर्पति॒ त्वच॒मत्यो॒ न क्रीळ॑न्नसर॒द्वृषा॒ हरि॑:॥

vipaścite pavamānāya gāyata mahī na dhārātyandho arṣati |ahirna jūrṇāmati sarpati tvacamatyo na krīḷannasaradvṛṣā hari: ||

अ॒ग्रे॒गो राजाप्य॑स्तविष्यते वि॒मानो॒ अह्नां॒ भुव॑ने॒ष्वर्पि॑तः ।हरि॑र्घृ॒तस्नु॑: सु॒दृशी॑को अर्ण॒वो ज्यो॒तीर॑थः पवते रा॒य ओ॒क्य॑:॥

agrego rājāpyastaviṣyate vimāno ahnāṃ bhuvaneṣvarpitaḥ |harirghṛtasnu: sudṛśīko arṇavo jyotīrathaḥ pavate rāya okya: ||

अस॑र्जि स्क॒म्भो दि॒व उद्य॑तो॒ मद॒: परि॑ त्रि॒धातु॒र्भुव॑नान्यर्षति ।अं॒शुं रि॑हन्ति म॒तय॒: पनि॑प्नतं गि॒रा यदि॑ नि॒र्णिज॑मृ॒ग्मिणो॑ य॒युः॥

asarji skambho diva udyato mada: pari tridhāturbhuvanānyarṣati |aṃśuṃ rihanti mataya: panipnataṃ girā yadi nirṇijamṛgmiṇo yayuḥ ||

प्र ते॒ धारा॒ अत्यण्वा॑नि मे॒ष्य॑: पुना॒नस्य॑ सं॒यतो॑ यन्ति॒ रंह॑यः ।यद्गोभि॑रिन्दो च॒म्वो॑: सम॒ज्यस॒ आ सु॑वा॒नः सो॑म क॒लशे॑षु सीदसि॥

pra te dhārā atyaṇvāni meṣya: punānasya saṃyato yanti raṃhayaḥ |yadgobhirindo camvo: samajyasa ā suvānaḥ soma kalaśeṣu sīdasi ||

पव॑स्व सोम क्रतु॒विन्न॑ उ॒क्थ्योऽव्यो॒ वारे॒ परि॑ धाव॒ मधु॑ प्रि॒यम् ।ज॒हि विश्वा॑न्र॒क्षस॑ इन्दो अ॒त्रिणो॑ बृ॒हद्व॑देम वि॒दथे॑ सु॒वीरा॑:॥

pavasva soma kratuvinna ukthyo'vyo vāre pari dhāva madhu priyam |jahi viśvānrakṣasa indo atriṇo bṛhadvadema vidathe suvīrā: ||