Mandala.Sukta 10.126

शैलूषिः कुल्मलबर्हिषो, वामदेव्योऽहोमुग्वा। विश्वेदेवाः। उपरिष्टाद्बृहती,८ त्रिष्टुप्। · śailūṣiḥ kulmalabarhiṣo, vāmadevyo'homugvā | viśvedevāḥ | upariṣṭādbṛhatī,8 triṣṭup |

न तमंहो॒ न दु॑रि॒तं देवा॑सो अष्ट॒ मर्त्य॑म् ।स॒जोष॑सो॒ यम॑र्य॒मा मि॒त्रो नय॑न्ति॒ वरु॑णो॒ अति॒ द्विष॑:॥

na tamaṃho na duritaṃ devāso aṣṭa martyam |sajoṣaso yamaryamā mitro nayanti varuṇo ati dviṣa: ||

तद्धि व॒यं वृ॑णी॒महे॒ वरु॑ण॒ मित्रार्य॑मन् ।येना॒ निरंह॑सो यू॒यं पा॒थ ने॒था च॒ मर्त्य॒मति॒ द्विष॑:॥

taddhi vayaṃ vṛṇīmahe varuṇa mitrāryaman |yenā niraṃhaso yūyaṃ pātha nethā ca martyamati dviṣa: ||

ते नू॒नं नो॒ऽयमू॒तये॒ वरु॑णो मि॒त्रो अ॑र्य॒मा ।नयि॑ष्ठा उ नो ने॒षणि॒ पर्षि॑ष्ठा उ नः प॒र्षण्यति॒ द्विष॑:॥

te nūnaṃ no'yamūtaye varuṇo mitro aryamā |nayiṣṭhā u no neṣaṇi parṣiṣṭhā u naḥ parṣaṇyati dviṣa: ||

यू॒यं विश्वं॒ परि॑ पाथ॒ वरु॑णो मि॒त्रो अ॑र्य॒मा ।यु॒ष्माकं॒ शर्म॑णि प्रि॒ये स्याम॑ सुप्रणीत॒योऽति॒ द्विष॑:॥

yūyaṃ viśvaṃ pari pātha varuṇo mitro aryamā |yuṣmākaṃ śarmaṇi priye syāma supraṇītayo'ti dviṣa: ||

आ॒दि॒त्यासो॒ अति॒ स्रिधो॒ वरु॑णो मि॒त्रो अ॑र्य॒मा ।उ॒ग्रं म॒रुद्भी॑ रु॒द्रं हु॑वे॒मेन्द्र॑म॒ग्निं स्व॒स्तयेऽति॒ द्विष॑:॥

ādityāso ati sridho varuṇo mitro aryamā |ugraṃ marudbhī rudraṃ huvemendramagniṃ svastaye'ti dviṣa: ||

नेता॑र ऊ॒ षु ण॑स्ति॒रो वरु॑णो मि॒त्रो अ॑र्य॒मा ।अति॒ विश्वा॑नि दुरि॒ता राजा॑नश्चर्षणी॒नामति॒ द्विष॑:॥

netāra ū ṣu ṇastiro varuṇo mitro aryamā |ati viśvāni duritā rājānaścarṣaṇīnāmati dviṣa: ||

शु॒नम॒स्मभ्य॑मू॒तये॒ वरु॑णो मि॒त्रो अ॑र्य॒मा ।शर्म॑ यच्छन्तु स॒प्रथ॑ आदि॒त्यासो॒ यदीम॑हे॒ अति॒ द्विष॑:॥

śunamasmabhyamūtaye varuṇo mitro aryamā |śarma yacchantu sapratha ādityāso yadīmahe ati dviṣa: ||

यथा॑ ह॒ त्यद्व॑सवो गौ॒र्यं॑ चित्प॒दि षि॒ताममु॑ञ्चता यजत्राः ।ए॒वो ष्व१स्मन्मु॑ञ्चता॒ व्यंह॒: प्र ता॑र्यग्ने प्रत॒रं न॒ आयु॑:॥

yathā ha tyadvasavo gauryaṃ citpadi ṣitāmamuñcatā yajatrāḥ |evo ṣva1smanmuñcatā vyaṃha: pra tāryagne prataraṃ na āyu: ||