Mandala.Sukta 5.67

यजत आत्रेयः। मित्रावरुणौ। अनुष्टुप्। · yajata ātreyaḥ | mitrāvaruṇau | anuṣṭup |

बळि॒त्था दे॑व निष्कृ॒तमादि॑त्या यज॒तं बृ॒हत् ।वरु॑ण॒ मित्रार्य॑म॒न् वर्षि॑ष्ठं क्ष॒त्रमा॑शाथे॥

baḷitthā deva niṣkṛtamādityā yajataṃ bṛhat |varuṇa mitrāryaman varṣiṣṭhaṃ kṣatramāśāthe ||

आ यद् योनिं॑ हिर॒ण्ययं॒ वरु॑ण॒ मित्र॒ सद॑थः ।ध॒र्तारा॑ चर्षणी॒नां य॒न्तं सु॒म्नं रि॑शादसा॥

ā yad yoniṃ hiraṇyayaṃ varuṇa mitra sadathaḥ |dhartārā carṣaṇīnāṃ yantaṃ sumnaṃ riśādasā ||

विश्वे॒ हि वि॒श्ववे॑दसो॒ वरु॑णो मि॒त्रो अ॑र्य॒मा ।व्र॒ता प॒देव॑ सश्चिरे॒ पान्ति॒ मर्त्यं॑ रि॒षः॥

viśve hi viśvavedaso varuṇo mitro aryamā |vratā padeva saścire pānti martyaṃ riṣaḥ ||

ते हि स॒त्या ऋ॑त॒स्पृश॑ ऋ॒तावा॑नो॒ जने॑जने ।सु॒नी॒थास॑: सु॒दान॑वों॒ऽहोश्चि॑दुरु॒चक्र॑यः॥

te hi satyā ṛtaspṛśa ṛtāvāno janejane |sunīthāsa: sudānavoṃ'hościdurucakrayaḥ ||

को नु वां॑ मि॒त्रास्तु॑तो॒ वरु॑णो वा त॒नूना॑म् ।तत् सु वा॒मेष॑ते म॒तिरत्रि॑भ्य॒ एष॑ते म॒तिः॥

ko nu vāṃ mitrāstuto varuṇo vā tanūnām |tat su vāmeṣate matiratribhya eṣate matiḥ ||