Kanda.Sarga 5.49

ततः स कर्मणा तस्य विस्मितो भीमविक्रमः ।हनुमान् रोषताम्राक्षो रक्षोधिपमवैक्षत॥

tataḥ sa karmaṇā tasya vismito bhīmavikramaḥ |hanumān roṣatāmrākṣo rakṣodhipamavaikṣata ||

भ्राजमानं महार्हेण काञ्चनेन विराजता ।मुक्ताजालावृतेनाथ मुकुटेन महाद्युतिम्॥

bhrājamānaṃ mahārheṇa kāñcanena virājatā |muktājālāvṛtenātha mukuṭena mahādyutim ||

वज्रसंयोगसंयुक्तैर्महार्हमणिविग्रहैः ।हैमैराभरणैश्चित्रैर्मनसेव प्रकल्पितैः॥

vajrasaṃyogasaṃyuktairmahārhamaṇivigrahaiḥ |haimairābharaṇaiścitrairmanaseva prakalpitaiḥ ||

महार्हक्षौमसंवीतं रक्तचन्दनरूषितम् ।स्वनुलिप्तं विचित्राभिर्विविधाभिश्च भक्तिभिः॥

mahārhakṣaumasaṃvītaṃ raktacandanarūṣitam |svanuliptaṃ vicitrābhirvividhābhiśca bhaktibhiḥ ||

विवृतैर्दर्शनीयैश्च रक्ताक्षैर्भीमदर्शनैः ।दीप्ततीक्ष्णमहादंष्ट्रैः प्रलम्बदशनच्छदैः॥

vivṛtairdarśanīyaiśca raktākṣairbhīmadarśanaiḥ |dīptatīkṣṇamahādaṃṣṭraiḥ pralambadaśanacchadaiḥ ||

शिरोभिर्दशभिर्वीरं भ्राजमानं महौजसम् ।नानाव्यालसमाकीर्णैः शिखरैरिव मन्दरम्॥

śirobhirdaśabhirvīraṃ bhrājamānaṃ mahaujasam |nānāvyālasamākīrṇaiḥ śikharairiva mandaram ||

नीलाञ्जनचयप्रख्यं हारेणोरसि राजता ।पूर्णचन्द्राभवक्रेण सबलाकमिवाम्बुदम्॥

nīlāñjanacayaprakhyaṃ hāreṇorasi rājatā |pūrṇacandrābhavakreṇa sabalākamivāmbudam ||

बाहुभिर्बद्धकेयूरैश्चन्दनोत्तमरूषितैः ।भ्राजमानाङ्गदैः पीनैः पञ्चशीर्षौरिवोरगैः॥

bāhubhirbaddhakeyūraiścandanottamarūṣitaiḥ |bhrājamānāṅgadaiḥ pīnaiḥ pañcaśīrṣaurivoragaiḥ ||

महति स्फाटिके चित्रे रत्नसंयोगसंस्कृते ।उत्तमास्तरणास्तीर्णे सूपविष्टं वरासने॥

mahati sphāṭike citre ratnasaṃyogasaṃskṛte |uttamāstaraṇāstīrṇe sūpaviṣṭaṃ varāsane ||

अलंकृताभिरत्यर्थं प्रमदाभिः समन्ततः ।वालव्यजनहस्ताभिरारात् समुपसेवितम्॥

alaṃkṛtābhiratyarthaṃ pramadābhiḥ samantataḥ |vālavyajanahastābhirārāt samupasevitam ||

दुर्धरेण प्रहस्तेन महापार्श्वेन रक्षसा ।मन्त्रिभिर्मन्त्रतत्त्वज्ञैर्निकुम्भेन च मन्त्रिणा॥

durdhareṇa prahastena mahāpārśvena rakṣasā |mantribhirmantratattvajñairnikumbhena ca mantriṇā ||

सुखोपविष्टं रक्षोभिश्चतुर्भिर्बलदर्पितैः ।कृत्स्न परिवृतं लोकं चतुर्भिरिव सागरैः॥

sukhopaviṣṭaṃ rakṣobhiścaturbhirbaladarpitaiḥ |kṛtsna parivṛtaṃ lokaṃ caturbhiriva sāgaraiḥ ||

सचिवैर्मन्त्रतत्त्वज्ञैरन्यैश्च शुभबुद्धिभिः ।अन्वास्यमानं रक्षोभिः सुरैरिव सुरेश्वरम्॥

sacivairmantratattvajñairanyaiśca śubhabuddhibhiḥ |anvāsyamānaṃ rakṣobhiḥ surairiva sureśvaram ||

अपश्यद्राक्षसपतिं हनुमानतितेजसम् ।विष्ठितं मेरुशिखरे सतोयमिव तोयदम्॥

apaśyadrākṣasapatiṃ hanumānatitejasam |viṣṭhitaṃ meruśikhare satoyamiva toyadam ||

स तैः संपीड्यमानो ऽपि रक्षोभिर्भीमविक्रमैः ।विस्मयं परमं गत्वा रक्षोधिपमवैक्षत॥

sa taiḥ saṃpīḍyamāno 'pi rakṣobhirbhīmavikramaiḥ |vismayaṃ paramaṃ gatvā rakṣodhipamavaikṣata ||

भ्राजमानं ततो दृष्ट्वा हनुमान् राक्षसेश्वरम् ।मनसा चिन्तयामास तेजसा तस्य मोहितः॥

bhrājamānaṃ tato dṛṣṭvā hanumān rākṣaseśvaram |manasā cintayāmāsa tejasā tasya mohitaḥ ||

अहो रूपमहो धैर्यमहो सत्त्वमहो द्युतिः ।अहो राक्षसराजस्य सर्वलक्षणयुक्तता॥

aho rūpamaho dhairyamaho sattvamaho dyutiḥ |aho rākṣasarājasya sarvalakṣaṇayuktatā ||

यद्यधर्मो न बलवान् स्यादयं राक्षसेश्वरः ।स्यादय सुरलोकस्य सशक्रस्यापि रक्षिता॥

yadyadharmo na balavān syādayaṃ rākṣaseśvaraḥ |syādaya suralokasya saśakrasyāpi rakṣitā ||

अस्य क्रूरैर्नृशंसैश्च कर्मभिर्लोककुत्सितैः ।तेन बिभ्यति खल्वस्माल्लोकाः सामरदानवाः॥

asya krūrairnṛśaṃsaiśca karmabhirlokakutsitaiḥ |tena bibhyati khalvasmāllokāḥ sāmaradānavāḥ ||

अयं ह्युत्सहते क्रुद्धः कर्तुमेकार्णवं जगत् ।इति चिन्तां बहुविधामकरोन्मतिमान् हरिः ।दृष्ट्वा राक्षसराजस्य प्रभावममितौजसः॥

ayaṃ hyutsahate kruddhaḥ kartumekārṇavaṃ jagat |iti cintāṃ bahuvidhāmakaronmatimān hariḥ |dṛṣṭvā rākṣasarājasya prabhāvamamitaujasaḥ ||