Parva.Adhyaya 1.90

जनमेजय उवाच · janamejaya uvāca

श्रुतस्त्वत्तो मया विप्र पूर्वेषां संभवो महान्उदाराश्चापि वंशेऽस्मिन्राजानो मे परिश्रुताः

śrutastvatto mayā vipra pūrveṣāṃ saṃbhavo mahānudārāścāpi vaṃśe'sminrājāno me pariśrutāḥ

किं तु लघ्वर्थसंयुक्तं प्रियाख्यानं न मामतिप्रीणात्यतो भवान्भूयो विस्तरेण ब्रवीतु मे

kiṃ tu laghvarthasaṃyuktaṃ priyākhyānaṃ na māmatiprīṇātyato bhavānbhūyo vistareṇa bravītu me

एतामेव कथां दिव्यामा प्रजापतितो मनोःतेषामाजननं पुण्यं कस्य न प्रीतिमावहेत्

etāmeva kathāṃ divyāmā prajāpatito manoḥteṣāmājananaṃ puṇyaṃ kasya na prītimāvahet

सद्धर्मगुणमाहात्म्यैरभिवर्धितमुत्तमम्विष्टभ्य लोकांस्त्रीनेषां यशः स्फीतमवस्थितम्

saddharmaguṇamāhātmyairabhivardhitamuttamamviṣṭabhya lokāṃstrīneṣāṃ yaśaḥ sphītamavasthitam

गुणप्रभाववीर्यौजःसत्त्वोत्साहवतामहम्न तृप्यामि कथां शृण्वन्नमृतास्वादसंमिताम्

guṇaprabhāvavīryaujaḥsattvotsāhavatāmahamna tṛpyāmi kathāṃ śṛṇvannamṛtāsvādasaṃmitām

वैशंपायन उवाच · vaiśaṃpāyana uvāca

शृणु राजन्पुरा सम्यङ्मया द्वैपायनाच्छ्रुतम्प्रोच्यमानमिदं कृत्स्नं स्ववंशजननं शुभम्

śṛṇu rājanpurā samyaṅmayā dvaipāyanācchrutamprocyamānamidaṃ kṛtsnaṃ svavaṃśajananaṃ śubham

दक्षस्यादितिःअदितेर्विवस्वान्विवस्वतो मनुःमनोरिलाइलायाः पुरूरवाःपुरूरवस आयुःआयुषो नहुषःनहुषस्य ययातिः

dakṣasyāditiḥaditervivasvānvivasvato manuḥmanorilāilāyāḥ purūravāḥpurūravasa āyuḥāyuṣo nahuṣaḥnahuṣasya yayātiḥ

ययातेर्द्वे भार्ये बभूवतुःउशनसो दुहिता देवयानी वृषपर्वणश्च दुहिता शर्मिष्ठा नामअत्रानुवंशो भवति

yayāterdve bhārye babhūvatuḥuśanaso duhitā devayānī vṛṣaparvaṇaśca duhitā śarmiṣṭhā nāmaatrānuvaṃśo bhavati

यदुं च तुर्वसुं चैव देवयानी व्यजायतद्रुह्युं चानुं च पूरुं च शर्मिष्ठा वार्षपर्वणी

yaduṃ ca turvasuṃ caiva devayānī vyajāyatadruhyuṃ cānuṃ ca pūruṃ ca śarmiṣṭhā vārṣaparvaṇī

तत्र यदोर्यादवाःपूरोः पौरवाः

tatra yadoryādavāḥpūroḥ pauravāḥ

पूरोर्भार्या कौसल्या नामतस्यामस्य जज्ञे जनमेजयो नामयस्त्रीनश्वमेधानाजहारविश्वजिता चेष्ट्वा वनं प्रविवेश

pūrorbhāryā kausalyā nāmatasyāmasya jajñe janamejayo nāmayastrīnaśvamedhānājahāraviśvajitā ceṣṭvā vanaṃ praviveśa

जनमेजयः खल्वनन्तां नामोपयेमे माधवीम्तस्यामस्य जज्ञे प्राचिन्वान्यः प्राचीं दिशं जिगाय यावत्सूर्योदयात्ततस्तस्य प्राचिन्वत्वम्

janamejayaḥ khalvanantāṃ nāmopayeme mādhavīmtasyāmasya jajñe prācinvānyaḥ prācīṃ diśaṃ jigāya yāvatsūryodayāttatastasya prācinvatvam

प्राचिन्वान्खल्वश्मकीमुपयेमेतस्यामस्य जज्ञे संयातिः

prācinvānkhalvaśmakīmupayemetasyāmasya jajñe saṃyātiḥ

संयातिः खलु दृषद्वतो दुहितरं वराङ्गीं नामोपयेमेतस्यामस्य जज्ञे अहंपातिः

saṃyātiḥ khalu dṛṣadvato duhitaraṃ varāṅgīṃ nāmopayemetasyāmasya jajñe ahaṃpātiḥ

अहंपातिस्तु खलु कृतवीर्यदुहितरमुपयेमे भानुमतीं नामतस्यामस्य जज्ञे सार्वभौमः

ahaṃpātistu khalu kṛtavīryaduhitaramupayeme bhānumatīṃ nāmatasyāmasya jajñe sārvabhaumaḥ

सार्वभौमः खलु जित्वाजहार कैकेयीं सुनन्दां नामतस्यामस्य जज्ञे जयत्सेनः

sārvabhaumaḥ khalu jitvājahāra kaikeyīṃ sunandāṃ nāmatasyāmasya jajñe jayatsenaḥ

जयत्सेनः खलु वैदर्भीमुपयेमे सुषुवां नामतस्यामस्य जज्ञे अराचीनः

jayatsenaḥ khalu vaidarbhīmupayeme suṣuvāṃ nāmatasyāmasya jajñe arācīnaḥ

अराचीनोऽपि वैदर्भीमेवापरामुपयेमे मर्यादां नामतस्यामस्य जज्ञे महाभौमः

arācīno'pi vaidarbhīmevāparāmupayeme maryādāṃ nāmatasyāmasya jajñe mahābhaumaḥ

महाभौमः खलु प्रासेनजितीमुपयेमे सुयज्ञां नामतस्यामस्य जज्ञे अयुतनायीयः पुरुषमेधानामयुतमानयत्तदस्यायुतनायित्वम्

mahābhaumaḥ khalu prāsenajitīmupayeme suyajñāṃ nāmatasyāmasya jajñe ayutanāyīyaḥ puruṣamedhānāmayutamānayattadasyāyutanāyitvam

अयुतनायी खलु पृथुश्रवसो दुहितरमुपयेमे भासां नामतस्यामस्य जज्ञे अक्रोधनः

ayutanāyī khalu pṛthuśravaso duhitaramupayeme bhāsāṃ nāmatasyāmasya jajñe akrodhanaḥ

अक्रोधनः खलु कालिङ्गीं करण्डुं नामोपयेमेतस्यामस्य जज्ञे देवातिथिः

akrodhanaḥ khalu kāliṅgīṃ karaṇḍuṃ nāmopayemetasyāmasya jajñe devātithiḥ

देवातिथिः खलु वैदेहीमुपयेमे मर्यादां नामतस्यामस्य जज्ञे ऋचः

devātithiḥ khalu vaidehīmupayeme maryādāṃ nāmatasyāmasya jajñe ṛcaḥ

ऋचः खल्वाङ्गेयीमुपयेमे सुदेवां नामतस्यां पुत्रमजनयदृक्षम्

ṛcaḥ khalvāṅgeyīmupayeme sudevāṃ nāmatasyāṃ putramajanayadṛkṣam

ऋक्षः खलु तक्षकदुहितरमुपयेमे ज्वालां नामतस्यां पुत्रं मतिनारं नामोत्पादयामास

ṛkṣaḥ khalu takṣakaduhitaramupayeme jvālāṃ nāmatasyāṃ putraṃ matināraṃ nāmotpādayāmāsa

मतिनारः खलु सरस्वत्यां द्वादशवार्षिकं सत्रमाजहार

matināraḥ khalu sarasvatyāṃ dvādaśavārṣikaṃ satramājahāra

निवृत्ते च सत्रे सरस्वत्यभिगम्य तं भर्तारं वरयामासतस्यां पुत्रमजनयत्तंसुं नाम

nivṛtte ca satre sarasvatyabhigamya taṃ bhartāraṃ varayāmāsatasyāṃ putramajanayattaṃsuṃ nāma

अत्रानुवंशो भवति

atrānuvaṃśo bhavati

तंसुं सरस्वती पुत्रं मतिनारादजीजनत्इलिनं जनयामास कालिन्द्यां तंसुरात्मजम्

taṃsuṃ sarasvatī putraṃ matinārādajījanatilinaṃ janayāmāsa kālindyāṃ taṃsurātmajam

इलिनस्तु रथंतर्यां दुःषन्ताद्यान्पञ्च पुत्रानजनयत्

ilinastu rathaṃtaryāṃ duḥṣantādyānpañca putrānajanayat

दुःषन्तः खलु विश्वामित्रदुहितरं शकुन्तलां नामोपयेमेतस्यामस्य जज्ञे भरतःतत्र श्लोकौ भवतः

duḥṣantaḥ khalu viśvāmitraduhitaraṃ śakuntalāṃ nāmopayemetasyāmasya jajñe bharataḥtatra ślokau bhavataḥ

माता भस्त्रा पितुः पुत्रो येन जातः स एव सःभरस्व पुत्रं दुःषन्त मावमंस्थाः शकुन्तलाम्

mātā bhastrā pituḥ putro yena jātaḥ sa eva saḥbharasva putraṃ duḥṣanta māvamaṃsthāḥ śakuntalām

रेतोधाः पुत्र उन्नयति नरदेव यमक्षयात्त्वं चास्य धाता गर्भस्य सत्यमाह शकुन्तला

retodhāḥ putra unnayati naradeva yamakṣayāttvaṃ cāsya dhātā garbhasya satyamāha śakuntalā

ततोऽस्य भरतत्वम्

tato'sya bharatatvam

भरतः खलु काशेयीमुपयेमे सार्वसेनीं सुनन्दां नामतस्यामस्य जज्ञे भुमन्युः

bharataḥ khalu kāśeyīmupayeme sārvasenīṃ sunandāṃ nāmatasyāmasya jajñe bhumanyuḥ

भुमन्युः खलु दाशार्हीमुपयेमे जयां नामतस्यामस्य जज्ञे सुहोत्रः

bhumanyuḥ khalu dāśārhīmupayeme jayāṃ nāmatasyāmasya jajñe suhotraḥ

सुहोत्रः खल्विक्ष्वाकुकन्यामुपयेमे सुवर्णां नामतस्यामस्य जज्ञे हस्तीय इदं हास्तिनपुरं मापयामासएतदस्य हास्तिनपुरत्वम्

suhotraḥ khalvikṣvākukanyāmupayeme suvarṇāṃ nāmatasyāmasya jajñe hastīya idaṃ hāstinapuraṃ māpayāmāsaetadasya hāstinapuratvam

हस्ती खलु त्रैगर्तीमुपयेमे यशोधरां नामतस्यामस्य जज्ञे विकुण्ठनः

hastī khalu traigartīmupayeme yaśodharāṃ nāmatasyāmasya jajñe vikuṇṭhanaḥ

विकुण्ठनः खलु दाशार्हीमुपयेमे सुदेवां नामतस्यामस्य जज्ञेऽजमीढः

vikuṇṭhanaḥ khalu dāśārhīmupayeme sudevāṃ nāmatasyāmasya jajñe'jamīḍhaḥ

अजमीढस्य चतुर्विंशं पुत्रशतं बभूव कैकेय्यां नागायां गान्धार्यां विमलायामृक्षायां चेतिपृथक्पृथग्वंशकरा नृपतयःतत्र वंशकरः संवरणः

ajamīḍhasya caturviṃśaṃ putraśataṃ babhūva kaikeyyāṃ nāgāyāṃ gāndhāryāṃ vimalāyāmṛkṣāyāṃ cetipṛthakpṛthagvaṃśakarā nṛpatayaḥtatra vaṃśakaraḥ saṃvaraṇaḥ

संवरणः खलु वैवस्वतीं तपतीं नामोपयेमेतस्यामस्य जज्ञे कुरुः

saṃvaraṇaḥ khalu vaivasvatīṃ tapatīṃ nāmopayemetasyāmasya jajñe kuruḥ

कुरुः खलु दाशार्हीमुपयेमे शुभाङ्गीं नामतस्यामस्य जज्ञे विडूरथः

kuruḥ khalu dāśārhīmupayeme śubhāṅgīṃ nāmatasyāmasya jajñe viḍūrathaḥ

विडूरथस्तु मागधीमुपयेमे संप्रियां नामतस्यामस्य जज्ञेऽरुग्वान्नाम

viḍūrathastu māgadhīmupayeme saṃpriyāṃ nāmatasyāmasya jajñe'rugvānnāma

अरुग्वान्खलु मागधीमुपयेमेऽमृतां नामतस्यामस्य जज्ञे परिक्षित्

arugvānkhalu māgadhīmupayeme'mṛtāṃ nāmatasyāmasya jajñe parikṣit

परिक्षित्खलु बाहुदामुपयेमे सुयशां नामतस्यामस्य जज्ञे भीमसेनः

parikṣitkhalu bāhudāmupayeme suyaśāṃ nāmatasyāmasya jajñe bhīmasenaḥ

भीमसेनः खलु कैकेयीमुपयेमे सुकुमारीं नामतस्यामस्य जज्ञे पर्यश्रवाःयमाहुः प्रतीपं नाम

bhīmasenaḥ khalu kaikeyīmupayeme sukumārīṃ nāmatasyāmasya jajñe paryaśravāḥyamāhuḥ pratīpaṃ nāma

प्रतीपः खलु शैब्यामुपयेमे सुनन्दां नामतस्यां पुत्रानुत्पादयामास देवापिं शंतनुं बाह्लीकं चेति

pratīpaḥ khalu śaibyāmupayeme sunandāṃ nāmatasyāṃ putrānutpādayāmāsa devāpiṃ śaṃtanuṃ bāhlīkaṃ ceti

देवापिः खलु बाल एवारण्यं प्रविवेशशंतनुस्तु महीपालोऽभवत्अत्रानुवंशो भवति

devāpiḥ khalu bāla evāraṇyaṃ praviveśaśaṃtanustu mahīpālo'bhavatatrānuvaṃśo bhavati

यं यं कराभ्यां स्पृशति जीर्णं स सुखमश्नुतेपुनर्युवा च भवति तस्मात्तं शंतनुं विदुः

yaṃ yaṃ karābhyāṃ spṛśati jīrṇaṃ sa sukhamaśnutepunaryuvā ca bhavati tasmāttaṃ śaṃtanuṃ viduḥ

तदस्य शंतनुत्वम्

tadasya śaṃtanutvam

शंतनुः खलु गङ्गां भागीरथीमुपयेमेतस्यामस्य जज्ञे देवव्रतःयमाहुर्भीष्म इति

śaṃtanuḥ khalu gaṅgāṃ bhāgīrathīmupayemetasyāmasya jajñe devavrataḥyamāhurbhīṣma iti

भीष्मः खलु पितुः प्रियचिकीर्षया सत्यवतीमुदवहन्मातरम्यामाहुर्गन्धकालीति

bhīṣmaḥ khalu pituḥ priyacikīrṣayā satyavatīmudavahanmātaramyāmāhurgandhakālīti

तस्यां कानीनो गर्भः पराशराद्द्वैपायनःतस्यामेव शंतनोर्द्वौ पुत्रौ बभूवतुःचित्राङ्गदो विचित्रवीर्यश्च

tasyāṃ kānīno garbhaḥ parāśarāddvaipāyanaḥtasyāmeva śaṃtanordvau putrau babhūvatuḥcitrāṅgado vicitravīryaśca

तयोरप्राप्तयौवन एव चित्राङ्गदो गन्धर्वेण हतःविचित्रवीर्यस्तु राजा समभवत्

tayoraprāptayauvana eva citrāṅgado gandharveṇa hataḥvicitravīryastu rājā samabhavat

विचित्रवीर्यः खलु कौसल्यात्मजेऽम्बिकाम्बालिके काशिराजदुहितरावुपयेमे

vicitravīryaḥ khalu kausalyātmaje'mbikāmbālike kāśirājaduhitarāvupayeme

विचित्रवीर्यस्त्वनपत्य एव विदेहत्वं प्राप्तः

vicitravīryastvanapatya eva videhatvaṃ prāptaḥ

ततः सत्यवती चिन्तयामासदौःषन्तो वंश उच्छिद्यते इति

tataḥ satyavatī cintayāmāsadauḥṣanto vaṃśa ucchidyate iti

सा द्वैपायनमृषिं चिन्तयामास

sā dvaipāyanamṛṣiṃ cintayāmāsa

स तस्याः पुरतः स्थितः किं करवाणीति

sa tasyāḥ purataḥ sthitaḥ kiṃ karavāṇīti

सा तमुवाचभ्राता तवानपत्य एव स्वर्यातो विचित्रवीर्यःसाध्वपत्यं तस्योत्पादयेति

sā tamuvācabhrātā tavānapatya eva svaryāto vicitravīryaḥsādhvapatyaṃ tasyotpādayeti

स परमित्युक्त्वा त्रीन्पुत्रानुत्पादयामास धृतराष्ट्रं पाण्डुं विदुरं चेति

sa paramityuktvā trīnputrānutpādayāmāsa dhṛtarāṣṭraṃ pāṇḍuṃ viduraṃ ceti

तत्र धृतराष्ट्रस्य राज्ञः पुत्रशतं बभूव गान्धार्यां वरदानाद्द्वैपायनस्य

tatra dhṛtarāṣṭrasya rājñaḥ putraśataṃ babhūva gāndhāryāṃ varadānāddvaipāyanasya

तेषां धृतराष्ट्रस्य पुत्राणां चत्वारः प्रधाना बभूवुर्दुर्योधनो दुःशासनो विकर्णश्चित्रसेन इति

teṣāṃ dhṛtarāṣṭrasya putrāṇāṃ catvāraḥ pradhānā babhūvurduryodhano duḥśāsano vikarṇaścitrasena iti

पाण्डोस्तु द्वे भार्ये बभूवतुः कुन्ती माद्री चेत्युभे स्त्रीरत्ने

pāṇḍostu dve bhārye babhūvatuḥ kuntī mādrī cetyubhe strīratne

अथ पाण्डुर्मृगयां चरन्मैथुनगतमृषिमपश्यन्मृग्यां वर्तमानम्तथैवाप्लुतमनासादितकामरसमतृप्तं बाणेनाभिजघान

atha pāṇḍurmṛgayāṃ caranmaithunagatamṛṣimapaśyanmṛgyāṃ vartamānamtathaivāplutamanāsāditakāmarasamatṛptaṃ bāṇenābhijaghāna

स बाणविद्ध उवाच पाण्डुम्चरता धर्ममिमं येन त्वयाभिज्ञेन कामरसस्याहमनवाप्तकामरसोऽभिहतस्तस्मात्त्वमप्येतामवस्थामासाद्यानवाप्तकामरसः पञ्चत्वमाप्स्यसि क्षिप्रमेवेति

sa bāṇaviddha uvāca pāṇḍumcaratā dharmamimaṃ yena tvayābhijñena kāmarasasyāhamanavāptakāmaraso'bhihatastasmāttvamapyetāmavasthāmāsādyānavāptakāmarasaḥ pañcatvamāpsyasi kṣiprameveti

स विवर्णरूपः पाण्डुः शापं परिहरमाणो नोपासर्पत भार्ये

sa vivarṇarūpaḥ pāṇḍuḥ śāpaṃ pariharamāṇo nopāsarpata bhārye

वाक्यं चोवाचस्वचापल्यादिदं प्राप्तवानहम्शृणोमि च नानपत्यस्य लोका सन्तीति

vākyaṃ covācasvacāpalyādidaṃ prāptavānahamśṛṇomi ca nānapatyasya lokā santīti

सा त्वं मदर्थे पुत्रानुत्पादयेति कुन्तीमुवाच

sā tvaṃ madarthe putrānutpādayeti kuntīmuvāca

सा तत्र पुत्रानुत्पादयामास धर्माद्युधिष्ठिरं मारुताद्भीमसेनं शक्रादर्जुनमिति

sā tatra putrānutpādayāmāsa dharmādyudhiṣṭhiraṃ mārutādbhīmasenaṃ śakrādarjunamiti

स तां हृष्टरूपः पाण्डुरुवाचइयं ते सपत्न्यनपत्यासाध्वस्यामपत्यमुत्पाद्यतामिति

sa tāṃ hṛṣṭarūpaḥ pāṇḍuruvācaiyaṃ te sapatnyanapatyāsādhvasyāmapatyamutpādyatāmiti

स एवमस्त्वित्युक्तः कुन्त्या

sa evamastvityuktaḥ kuntyā

ततो माद्र्यामश्विभ्यां नकुलसहदेवावुत्पादितौ

tato mādryāmaśvibhyāṃ nakulasahadevāvutpāditau

माद्रीं खल्वलंकृतां दृष्ट्वा पाण्डुर्भावं चक्रे

mādrīṃ khalvalaṃkṛtāṃ dṛṣṭvā pāṇḍurbhāvaṃ cakre

स तां स्पृष्ट्वैव विदेहत्वं प्राप्तः

sa tāṃ spṛṣṭvaiva videhatvaṃ prāptaḥ

तत्रैनं चितास्थं माद्री समन्वारुरोह

tatrainaṃ citāsthaṃ mādrī samanvāruroha

उवाच कुन्तीम्यमयोरार्ययाप्रमत्तया भवितव्यमिति

uvāca kuntīmyamayorāryayāpramattayā bhavitavyamiti

ततस्ते पञ्च पाण्डवाः कुन्त्या सहिता हास्तिनपुरमानीय तापसैर्भीष्मस्य विदुरस्य च निवेदिताः

tataste pañca pāṇḍavāḥ kuntyā sahitā hāstinapuramānīya tāpasairbhīṣmasya vidurasya ca niveditāḥ

तत्रापि जतुगृहे दग्धुं समारब्धा न शकिता विदुरमन्त्रितेन

tatrāpi jatugṛhe dagdhuṃ samārabdhā na śakitā viduramantritena

ततश्च हिडिम्बमन्तरा हत्वा एकचक्रां गताः

tataśca hiḍimbamantarā hatvā ekacakrāṃ gatāḥ

तस्यामप्येकचक्रायां बकं नाम राक्षसं हत्वा पाञ्चालनगरमभिगताः

tasyāmapyekacakrāyāṃ bakaṃ nāma rākṣasaṃ hatvā pāñcālanagaramabhigatāḥ

तस्माद्द्रौपदीं भार्यामविन्दन्स्वविषयं चाजग्मुः कुशलिनः

tasmāddraupadīṃ bhāryāmavindansvaviṣayaṃ cājagmuḥ kuśalinaḥ

पुत्रांश्चोत्पादयामासुःप्रतिविन्ध्यं युधिष्ठिरःसुतसोमं वृकोदरःश्रुतकीर्तिमर्जुनःशतानीकं नकुलःश्रुतकर्माणं सहदेव इति

putrāṃścotpādayāmāsuḥprativindhyaṃ yudhiṣṭhiraḥsutasomaṃ vṛkodaraḥśrutakīrtimarjunaḥśatānīkaṃ nakulaḥśrutakarmāṇaṃ sahadeva iti

युधिष्ठिरस्तु गोवासनस्य शैब्यस्य देविकां नाम कन्यां स्वयंवरे लेभेतस्यां पुत्रं जनयामास यौधेयं नाम

yudhiṣṭhirastu govāsanasya śaibyasya devikāṃ nāma kanyāṃ svayaṃvare lebhetasyāṃ putraṃ janayāmāsa yaudheyaṃ nāma

भीमसेनोऽपि काश्यां बलधरां नामोपयेमे वीर्यशुल्काम्तस्यां पुत्रं सर्वगं नामोत्पादयामास

bhīmaseno'pi kāśyāṃ baladharāṃ nāmopayeme vīryaśulkāmtasyāṃ putraṃ sarvagaṃ nāmotpādayāmāsa

अर्जुनः खलु द्वारवतीं गत्वा भगिनीं वासुदेवस्य सुभद्रां नाम भार्यामुदवहत्तस्यां पुत्रमभिमन्युं नाम जनयामास

arjunaḥ khalu dvāravatīṃ gatvā bhaginīṃ vāsudevasya subhadrāṃ nāma bhāryāmudavahattasyāṃ putramabhimanyuṃ nāma janayāmāsa

नकुलस्तु चैद्यां करेणुवतीं नाम भार्यामुदवहत्तस्यां पुत्रं निरमित्रं नामाजनयत्

nakulastu caidyāṃ kareṇuvatīṃ nāma bhāryāmudavahattasyāṃ putraṃ niramitraṃ nāmājanayat

सहदेवोऽपि माद्रीमेव स्वयंवरे विजयां नामोपयेमेतस्यां पुत्रमजनयत्सुहोत्रं नाम

sahadevo'pi mādrīmeva svayaṃvare vijayāṃ nāmopayemetasyāṃ putramajanayatsuhotraṃ nāma

भीमसेनस्तु पूर्वमेव हिडिम्बायां राक्षस्यां घटोत्कचं नाम पुत्रं जनयामास

bhīmasenastu pūrvameva hiḍimbāyāṃ rākṣasyāṃ ghaṭotkacaṃ nāma putraṃ janayāmāsa

इत्येते एकादश पाण्डवानां पुत्राः

ityete ekādaśa pāṇḍavānāṃ putrāḥ

विराटस्य दुहितरमुत्तरां नामाभिमन्युरुपयेमेतस्यामस्य परासुर्गर्भोऽजायत

virāṭasya duhitaramuttarāṃ nāmābhimanyurupayemetasyāmasya parāsurgarbho'jāyata

तमुत्सङ्गेन प्रतिजग्राह पृथा नियोगात्पुरुषोत्तमस्य वासुदेवस्यषाण्मासिकं गर्भमहमेनं जीवयिष्यामीति

tamutsaṅgena pratijagrāha pṛthā niyogātpuruṣottamasya vāsudevasyaṣāṇmāsikaṃ garbhamahamenaṃ jīvayiṣyāmīti

संजीवयित्वा चैनमुवाचपरिक्षीणे कुले जातो भवत्वयं परिक्षिन्नामेति

saṃjīvayitvā cainamuvācaparikṣīṇe kule jāto bhavatvayaṃ parikṣinnāmeti

परिक्षित्तु खलु माद्रवतीं नामोपयेमेतस्यामस्य जनमेजयः

parikṣittu khalu mādravatīṃ nāmopayemetasyāmasya janamejayaḥ

जनमेजयात्तु वपुष्टमायां द्वौ पुत्रौ शतानीकः शङ्कुश्च

janamejayāttu vapuṣṭamāyāṃ dvau putrau śatānīkaḥ śaṅkuśca

शतानीकस्तु खलु वैदेहीमुपयेमेतस्यामस्य जज्ञे पुत्रोऽश्वमेधदत्तः

śatānīkastu khalu vaidehīmupayemetasyāmasya jajñe putro'śvamedhadattaḥ

इत्येष पूरोर्वंशस्तु पाण्डवानां च कीर्तितःपूरोर्वंशमिमं श्रुत्वा सर्वपापैः प्रमुच्यते

ityeṣa pūrorvaṃśastu pāṇḍavānāṃ ca kīrtitaḥpūrorvaṃśamimaṃ śrutvā sarvapāpaiḥ pramucyate