Kanda.Sarga 6.84

राममाश्वासयाने तु लक्ष्मणे भ्रातृवत्सले।निक्षिप्य गुल्मान् स्वस्थाने तत्रागच्छद्विभीषणः॥

rāmamāśvāsayāne tu lakṣmaṇe bhrātṛvatsale |nikṣipya gulmān svasthāne tatrāgacchadvibhīṣaṇaḥ ||

नानाप्रहरणैर्वीरैश्चतुर्भिः सचिवैर्वृतः।नीलाञ्जनचयाकारैर्मातङ्गैरिव यूथपः॥

nānāpraharaṇairvīraiścaturbhiḥ sacivairvṛtaḥ |nīlāñjanacayākārairmātaṅgairiva yūthapaḥ ||

सो ऽभिगम्य महात्मानं राघवं शोकलालसम्।वानरांश्चैव ददृशे बाष्पपर्याकुलेक्षणान्॥

so 'bhigamya mahātmānaṃ rāghavaṃ śokalālasam |vānarāṃścaiva dadṛśe bāṣpaparyākulekṣaṇān ||

राघवं च महात्मानमिक्ष्वाकुकुलनन्दनम्।ददर्श मोहमापन्नं लक्ष्मणस्याङ्कमाश्रितम्॥

rāghavaṃ ca mahātmānamikṣvākukulanandanam |dadarśa mohamāpannaṃ lakṣmaṇasyāṅkamāśritam ||

व्रीडितं शोकसन्तप्तं दृष्ट्वा रामं विभीषणः।अन्तर्दुःखेन दीनात्मा किमेतदिति सो ऽब्रवीत्॥

vrīḍitaṃ śokasantaptaṃ dṛṣṭvā rāmaṃ vibhīṣaṇaḥ |antarduḥkhena dīnātmā kimetaditi so 'bravīt ||

विभीषणमुखं दृष्ट्वा सुग्रीवं तांश्च वानरान्।लक्ष्मणोवाच मन्दार्थमिदं बाष्पपरिप्लुतः॥

vibhīṣaṇamukhaṃ dṛṣṭvā sugrīvaṃ tāṃśca vānarān |lakṣmaṇovāca mandārthamidaṃ bāṣpapariplutaḥ ||

हतामिन्द्रजिता सीतामिह श्रुत्वैव राघवः।हनुमद्वचनात् सौम्य ततो मोहमुपागतः॥

hatāmindrajitā sītāmiha śrutvaiva rāghavaḥ |hanumadvacanāt saumya tato mohamupāgataḥ ||

कथयन्तं तु सौमित्रिं सन्निवार्य विभीषणः॥

kathayantaṃ tu saumitriṃ sannivārya vibhīṣaṇaḥ ||

मनुजेन्द्रार्तरूपेण यदुक्तं च हनूमता।तदयुक्तमहं मन्ये सागरस्येव शोषणम्॥

manujendrārtarūpeṇa yaduktaṃ ca hanūmatā |tadayuktamahaṃ manye sāgarasyeva śoṣaṇam ||

अभिप्रायं तु जानामि रावणस्य दुरात्मनः।सीतां प्रति महाबाहो न च घातं करिष्यति॥

abhiprāyaṃ tu jānāmi rāvaṇasya durātmanaḥ |sītāṃ prati mahābāho na ca ghātaṃ kariṣyati ||

याच्यमानस्तु बहुशो मया हितचिकीर्षुणा।वैदेहीमुत्सृजस्वेति न च तत् कृतवान् वचः॥

yācyamānastu bahuśo mayā hitacikīrṣuṇā |vaidehīmutsṛjasveti na ca tat kṛtavān vacaḥ ||

नैव साम्ना न दानेन न भेदेन कुतो युधा।सा द्रुष्टुमपि शक्येत नैव चान्येन केनचित्॥

naiva sāmnā na dānena na bhedena kuto yudhā |sā druṣṭumapi śakyeta naiva cānyena kenacit ||

वानरान् मोहयित्वा तु प्रतियातः स राक्षसः।चैत्यं निकुम्भिलां नाम यत्र होमं करिष्यति॥

vānarān mohayitvā tu pratiyātaḥ sa rākṣasaḥ |caityaṃ nikumbhilāṃ nāma yatra homaṃ kariṣyati ||

हुतवानुपयातो हि देवैरपि सवासवैः।दुराधर्षो भवत्येव सङ्ग्रामे रावणात्मजः॥

hutavānupayāto hi devairapi savāsavaiḥ |durādharṣo bhavatyeva saṅgrāme rāvaṇātmajaḥ ||

तेन मोहयता नूनमेषा माया प्रयोजिता।विघ्नमन्विच्छता तत्र वानराणां पराक्रमे॥

tena mohayatā nūnameṣā māyā prayojitā |vighnamanvicchatā tatra vānarāṇāṃ parākrame ||

ससैन्यास्तत्र गच्छामो यावत्तन्न समाप्यते।त्यजेमं नरशार्दूल मिथ्यासन्तापमागतम्।सीदते हि बलं सर्वं दृष्ट्वा त्वां शोककर्शितम्॥

sasainyāstatra gacchāmo yāvattanna samāpyate |tyajemaṃ naraśārdūla mithyāsantāpamāgatam |sīdate hi balaṃ sarvaṃ dṛṣṭvā tvāṃ śokakarśitam ||

इह त्वं स्वस्थहृदयस्तिष्ठ सत्त्वसमुच्छ्रितः।लक्ष्मणं प्रेषयास्माभिः सह सैन्यानुकर्षिभिः॥

iha tvaṃ svasthahṛdayastiṣṭha sattvasamucchritaḥ |lakṣmaṇaṃ preṣayāsmābhiḥ saha sainyānukarṣibhiḥ ||

एष तं नरशार्दूलो रावणिं निशितैः शरैः।त्याजयिष्यति तत् कर्म ततो वध्यो भविष्यति॥

eṣa taṃ naraśārdūlo rāvaṇiṃ niśitaiḥ śaraiḥ |tyājayiṣyati tat karma tato vadhyo bhaviṣyati ||

तस्यैते निशितास्तीक्ष्णाः पत्रिपत्राङ्गवाजिनः।पतत्रिण इवासौम्याः शराः पास्यन्ति शोणितम्॥

tasyaite niśitāstīkṣṇāḥ patripatrāṅgavājinaḥ |patatriṇa ivāsaumyāḥ śarāḥ pāsyanti śoṇitam ||

तं सन्दिश महावाहो लक्ष्मणं शुभलक्षणम्।राक्षसस्य विनाशाय वज्रं वज्रधरो यथा॥

taṃ sandiśa mahāvāho lakṣmaṇaṃ śubhalakṣaṇam |rākṣasasya vināśāya vajraṃ vajradharo yathā ||

मनुजवर न कालविप्रकर्षो रिपुनिधनं प्रति यत् क्षमो ऽद्य कर्तुम्।त्वमति सृज रिपोर्वधाय वाणीममररिपोर्मथने यथा महेन्द्रः॥

manujavara na kālaviprakarṣo ripunidhanaṃ prati yat kṣamo 'dya kartum |tvamati sṛja riporvadhāya vāṇīmamararipormathane yathā mahendraḥ ||

समाप्तकर्मा हि स राक्षसाधिपो भवत्यदृस्यः समरे सुरासुरैः।युयुत्सता तेन समाप्तकर्मणा भवेत् सुराणामपि संशयो महान्॥

samāptakarmā hi sa rākṣasādhipo bhavatyadṛsyaḥ samare surāsuraiḥ |yuyutsatā tena samāptakarmaṇā bhavet surāṇāmapi saṃśayo mahān ||

इत्यार्षे श्रीमद्रामायणे वाल्मीकीये आदिकाव्ये श्रीमद्युद्धकाण्डे चतुरशीतितमः सर्गः॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe caturaśītitamaḥ sargaḥ ||