Kanda.Sarga 5.60

तस्य तद्वचनं श्रुत्वा वालिसूनुरभाषत॥

tasya tadvacanaṃ śrutvā vālisūnurabhāṣata ||

अयुक्तं तु विना देवीं दृष्टवद्भिश्च वानराः ।समीपं गन्तुमस्माभी राघवस्य महात्मनः॥

ayuktaṃ tu vinā devīṃ dṛṣṭavadbhiśca vānarāḥ |samīpaṃ gantumasmābhī rāghavasya mahātmanaḥ ||

दृष्टा देवी न चानीता इति तत्र निवेदनम् ।अयुक्तमिव पश्यामि भवद्भिः ख्यातविक्रमैः॥

dṛṣṭā devī na cānītā iti tatra nivedanam |ayuktamiva paśyāmi bhavadbhiḥ khyātavikramaiḥ ||

न हि नः प्लवने कश्चिन्नापि कश्चित्पराक्रमे ।तुल्यः सामरदैत्येषु लोकेषु हरिसत्तमाः॥

na hi naḥ plavane kaścinnāpi kaścitparākrame |tulyaḥ sāmaradaityeṣu lokeṣu harisattamāḥ ||

तेष्वेवं हतवीरेषु राक्षसेषु हनूमता ।किमन्यदत्र कर्तव्यं गृहीत्वा याम जानकीम्॥

teṣvevaṃ hatavīreṣu rākṣaseṣu hanūmatā |kimanyadatra kartavyaṃ gṛhītvā yāma jānakīm ||

तमेवं कृतसङ्कल्पं जाम्बवान् हरिसत्तमः ।उवाच परमप्रीतो वाक्यमर्थवदर्थवित्॥

tamevaṃ kṛtasaṅkalpaṃ jāmbavān harisattamaḥ |uvāca paramaprīto vākyamarthavadarthavit ||

न तावदेषा मतिरक्षमा नो यथा भवान् पश्यति राजपुत्र ।यथा तु रामस्य मतिर्निविष्टा तथा भवान् पश्यतु कार्यसिद्धम्॥

na tāvadeṣā matirakṣamā no yathā bhavān paśyati rājaputra |yathā tu rāmasya matirniviṣṭā tathā bhavān paśyatu kāryasiddham ||